ગાંધીનગર: ચિલ્ડ્રન્સ યુનિવર્સિટીના માનનીય કુલપતિ તથા જાણીતા કેળવણીકાર શ્રી હર્ષદભાઈ શાહ (આદરણીય દાદા) શનિવારે ૧૮મી જૂને હોદ્દા પરથી નિવૃત્ત થયા. આ સાથે નવા ડાયરેક્ટર જનરલ તેમજ કુલપતિ તરીકે માનનીય શ્રી ડૉ. હર્ષદ પટેલે ચાર્જ સંભાળી લીધો છે. ચિલ્ડ્રન્સ યુનિવર્સિટીના ડાયરેક્ટર જનરલ તેમજ માનનીય કુલપતિ શ્રી હર્ષદભાઈ શાહની મુદ્દત શનિવારે પૂર્ણ થતી હોવાથી, રાજ્ય સરકાર દ્વારા નવા ડાયરેક્ટર જનરલ તેમજ કુલપતિ તરીકેનો વધારાનો ચાર્જ, ટીચર્સ યુનિવર્સિટીના માનનીય કુલપતિ શ્રી ડૉ. હર્ષદભાઈ પટેલને સોંપવામાં આવ્યો છે.
તેમણે શનિવારે શ્રી શાહ પાસેથી આ ચાર્જ સંભાળ્યો. ચિલ્ડ્રન્સ યુનિવર્સિટી પરિવાર દ્વારા નિવૃત્ત થતા કુલપતિશ્રીનો વિદાયમાન તેમજ નવા કુલપતિશ્રીનો સ્વાગત સમારોહ શનિવારે સાંજે યુનિવર્સિટી પરિસરમાં યોજવામાં આવ્યો. જેમાં માનનીય શ્રી હર્ષદભાઈ શાહ, કુલસચિવ ડૉ. અશોક પ્રજાપતિ તેમજ સમગ્ર યુનિવર્સિટી પરિવારે નવા કુલપતિશ્રીનું ભાવભેર સ્વાગત કર્યું. આ સાથે શ્રી હર્ષદભાઈ શાહને ભાવભેર વિદાયમાન આપ્યું.
સ્ટાફના સભ્યોએ માનનીય શાહસાહેબ સાથેના સંભારણા રજૂ કર્યા. આ પ્રસંગે કુલસચિવ ડૉ. અશોક પ્રજાપતિ સ્વાગત પ્રવચન સાથે ચિલ્ડ્રન્સ યુનિવર્સિટીનો પરિચય પણ આપ્યો. જ્યારે શ્રી હર્ષદભાઈ શાહે વિદાય પ્રવચનમાં યુનિવર્સિટીની વિકાસગાથા રજૂ કરી. આ સાથે તેમણે જરૂર પડ્યે કાર્ય હંમેશા ઉપસ્થિત રહેવાની તત્પરતા પણ વ્યક્ત કરી. નવનિયુક્ત માનનીય કુલપતિ શ્રી હર્ષદભાઈ પટેલે પ્રવચનમાં ચિલ્ડ્રન્સ યુનિવર્સિટીની વિકાસયાત્રાને વધુ ગતિથી આગળ લઈ જવાની નિષ્ઠા વ્યક્ત કરી.
તેમણે કહ્યું કે, સમય સાથે કાર્યશૈલી અને વ્યક્તિઓ, વ્યવસ્થાઓ બદલાતી રહે, પરંતુ ધ્યેય અચળ હોય છે અને તેને પામવા માટે સમયાંતરે જે વ્યવસ્થા જરૂરી હોય તે સર્જાતી હોય છે. સૌ સાથે મળીને યુનિવર્સિટીને નવી ઊંચાઈ પર લઈ જઈશું એવો વિશ્વાસ પણ તેમણે વ્યક્ત કર્યો હતો.