ગુજરાતમાં હાલમાં GST વિભાગ પેઢીઓ પર ત્રાટક્યું છે. ગત મહિને ઉત્તર ગુજરાતમાં GST વિભાગે સપાટો બોલાવ્યો હતો ત્યારે હવે સુરતની 75 પેઢીઓના 112 સ્થળોએ GST વિભાગે પોલીસને સાથે રાખીને દરોડા પાડતા હાહાકાર મચી ગયો છે. સુરતમાં GST વિભાગે બોગસ બિલિંગ કૌભાંડનો પર્દાફાશ કર્યો છે. GST વિભાગની તપાસમાં કેટલાક ચોંકાવનારા ખુલાસા પણ સામે આવ્યા છે. તપાસમાં 2768 કરોડના બોગસ બિલ બનાવ્યા હોવાનું ખુલતા લોકો ચોંકી ગયા છે. કરોડો રૂપિયાના બોગસ બિલ બનાવીને રૂપિયા 83 કરોડથી વધારેની ITC પાસ ઓન કરાવી છે.
આ કંપનીઓના GSTમાં નોંધાયેલા 48 બોગસ બેંક ખાતાને પણ શોધી લેવામાં આવ્યા છે. કૌભાંડીઓએ અલગ-અલગ લોકોના ડોક્યુમેન્ટનો ઉપયોગ કરીને બોગસ પેઢી બનાવી હતી. સૌથી ચોંકાવનારી વાત તો એ છે કે 75માંથી અધધ 61 પેઢીઓ તો સાવ બોગસ હોવાનું પણ સામે આવ્યું છે. વિગતો મળી રહી છે એ પ્રમાણે કેટલાક શાતિર શખ્સો શ્રમજીવી, રીક્ષા કે ગલ્લાવાળાના આધારકાર્ડ અને પાનકાર્ડ થોડા રૂપિયાની લાલચ આપીને લઈ લેતા હતા. તો કેટલાક ભેજાબાજોએ ઘર અને લોન અપાવવાનું કહીને લોકો પાસેથી ડોક્યુમેન્ટ લીધા હતા અને આ રીતે આખો ખેલ ચાલી રહ્યો હતો.
આ બધા જ કાંડ કર્યા પછી બોગસ બિલિંગ થકી સરકારને લાખો નહીં પણ કરોડો રૂપિયાનો ચૂનો ચોપડ્યો હતો. સાથે જ મકાન અને લોન બાબતે લોકોને શંકા ના જાય તે માટે બધા જ આરોપીઓએ 5 હજાર રૂપિયા પણ પધરાવી દીધા હતા. શ્રમજીવી, રીક્ષા કે ગલ્લાવાળાના આ દસ્તાવેજના આધારે બોગસ કંપનીઓ થકી બિલ બનાવીને કરોડોનો ખેલ નાખી લીધો પણ હવે એ સપનું જ રહી ગયું અને ભીંસ પડી ગઈ છે.
VIDEO: તુર્કીમાં ભૂકંપના 94 કલાક બાદ એક યુવકને કાટમાળમાંથી બહાર કાઢ્યો, પેશાબ પીને જીવતો થયો
આ વખતે પાડવામાં આવેલા દરોડા દરમિયાન પડદા પાછળ ખેલ કરનારા કેટલાક મુખ્ય સૂત્રધારના નામ પણ ખુલતા એક મોટું કાવતરું સામે આવ્યું છે.