રાજકોટમાં પરિણીતાએ પોતાના પતિના રંગીન મિજાજને છતો કરવા માટે એક એવી યુક્તિ વાપરી કે પતિની પોલ ખુલ્લી પડી ગઈ અને તેને ખબર પણ ના પડી. હવે આ મામલે પરિણતાએ પોતાના પતિ તથા સાસરિયા સામે ફરિયાદ નોંધાવી છે.રાજકોટની ૪૦ વર્ષની રાધિકા (નામ બદલ્યું છે)ના લગ્ન વર્ષ ૨૦૧૦માં અમદાવાદના રસેશ શાહ સાથે થયા હતા, લગ્ન જીવનમાં શરુઆતનો સમય બહુ સારો રહ્યો અને રાધિકાએ દીકરીને જન્મ આપ્યો હતો.
રાધિકા લગ્ન પછી રાજકોટમાં પિતાનું ઘર છોડીને પતિના ઘરે અમદાવાદમાં રહેવા માટે ગઈ હતી, અહીં તે પતિ સાથે સંયુક્ત પરિવારમાં રહેતી હતી. વર્ષ સુધી બધું સારું ચાલ્યા પછી રાધિકાને ઘરમાં નાની-નાની બાબતોમાં રોકટોક કરીને મેંણાટોંણા મારવામાં આવતા હતા. તેના ખરાબ પગલાને કારણે દીયરની નોકરી ગઈ હોવાના મેંણા પણ મારવામાં આવતા હતા.
આ પછી તેને એવું કહેવામાં આવતું હતું કે તમારા પપ્પાને કહો કે મને ક્યાંક નોકરી અપાવે. ત્રાસ અને અપમાન સહન કરીને રાધિકા પોતાનો અને બાળકનો વિચાર કરીને મેંણાટોંણાના કડવા ઘૂંટડા પી જતી હતી. સાસરિયા તરફથી મળતા ત્રાસની સાથે તેને ત્યારે ઝાટકો લાગ્યો કે જ્યારે તેના પતિ દ્વારા પર સ્ત્રી સાથે લાંબી-લાંબી વાતો કરવામાં આવતી હતી, તેણે પતિના ફોનમાં ડિટેલ્સ જાેયા બાદ પૂછ્યું કે તમે આટલી લાંબી વાતો કોની સાથે કરો છો? ત્યારે પતિએ પોતે આ છોકરી સાથે અગાઉ પ્રેમમાં હતો પરંતુ હવે તેઓ સારા મિત્રો છે તેમ કહીને વાત વાળી લીધી હતી.
સાસરીમાં નાની-નાની વાતોને લઈને રાધિકા કંટાળી ગઈ હતી ત્યાં તો તેના પતિને બ્રેઈન ટ્યુમર હોવાનો પહાડ તૂટી પડ્યો હતો. આ દરમિયાન પણ તેને પતિની સારવાર માટે પિયરમાંથી રૂપિયા લાવવા માટે દબાણ કરવામાં આવ્યું હતું. પતિનું ઓપરેશન થયા પછી જ્યારે તેઓ ઘરે આવ્યા તો સાસુએ રાધિકાને રસેશની સેવા-ચાકરી માટે પિયરથી રૂપિયા લાવવાનું કહીને એમ પણ કહી દીધું કે જાે આમ ના થઈ શકે તો તમે બન્ને અલગ રહેવા માટે જતા રહો. આ પછી રસેશ અને રાધિકા ભાડાના મકાનમાં રહેવા ગયા હતા અને તે રસેશે ફ્લેટ ખરીદ્યો અને જેના માટે રાધિકાએ પોતાના ઘરેણાં વેચીને પતિને ૪ લાખ રૂપિયા આપ્યા હતા.
પતિની હામાં હા રાખીને પોતાનો પરિવાર તૂટી નહીં તે માટે બધું સહન કરતી રાધિકાને ફરી ત્યારે ધ્રાસકો પડ્યો કે જ્યારે તે પ્રેગનેન્ટ હતી અને તેનો પતિ કોઈ અન્ય મહિલા સાથે ચેટિંગ કરતો હતો. આ મામલે સાસુએ પણ દીકરાનો પક્ષ લઈને કહ્યું કે તું એના પર ખોટી શંકાઓ કરે છે. પતિએ રાધિકાને તેના પિતાની મિલકતમાંથી તેનો ભાગ લખાવી લેવા માટે દબાણ કરીને તારીખ મે ૨૦૨૦માં તેના ઘરે રાજકોટ મૂકી ગયો હતો અને મિલકત તારા નામે થાય તો જ પાછી આવજે તેમ કહ્યું હતું.
પત્ની પિયર આવી ગઈ પછી તેનો પતિ આઝાદ થઈ ગયો હશે તેમ માનીને રાધિકાએ પતિના રંગીન મિજાજને છતો કરવા માટે એક યુક્તિ ઘડી નાખી હતી. જેમાં તેણે સોશિયલ મીડિયા પર ખોટા નામથી એક અકાઉન્ટ બનાવીને પતિ સાથે મિત્રતા કરી હતી. આ પછી બન્ને વચ્ચે ચેટિંગ ચાલતા પતિએ એવું પણ લખી દીધું હતું કે હું તારા માટે મારી પત્નીને છોડી દેવા માટે તૈયાર છું.
આ જાણીને રાધિકાએ પતિને ઉઘાડી પાડી તો પતિ તેની સાથે ઝઘડો કરીને તારે જે કરવું હોય એ કરી લે તેમ કહી દીધું હતું. વારંવાર માનસિક ત્રાસના કારણે રાધિકા ડિપ્રેશનમાં આવી ગઈ હતી અને તેનો પતિ દીકરીને મળવા આવે ત્યારે તે તેને મળતી નહોતી. આખરે રાધિકાએ અમદાવાદના પતિ અને સાસરિયા સામે રાજકોટના મહિલા પોલીસ સ્ટેશનમાં ફરિયાદ નોંધાવી છે.