અમદાવાદ ખાતે સ્પોર્ટસ ઓથોરિટી ઓફ ગુજરાત અને ટ્રાન્સસ્ટેડિયા યુનિવર્સિટી દ્વારા અમદાવાદના ઇકા ક્લબ ખાતે ગુજરાત સ્પોર્ટ્સ સ્ટાર્ટઅપ કોન્કલેવનું આયોજન કરવામાં આવ્યું છે. રમત ગમત મંત્રી હર્ષ સંઘવીના હસ્તે ગુજરાત સ્પોર્ટ્સ સ્ટાર્ટઅપ કોન્કલેવનો શુભારંભ કરવામાં આવ્યો હતો. ભારતભરનાં રમત-ગમત ક્ષેત્ર સાથે સંકળાયેલા આંત્રપ્રિન્યોર્સને પ્રોત્સાહન આપવા ગુજરાત સમગ્ર દેશમાં સ્પોર્ટ્સ સ્ટાર્ટઅપ કોન્કલેવનું આયોજન કરનાર પ્રથમ રાજ્ય બન્યું છે.
આ કાર્યક્રમને સંબોધતા રમત-ગમત અને ગૃહરાજ્ય મંત્રીશ્રી હર્ષ સંઘવીએ જણાવ્યું કે, મુખ્યમંત્રી ભૂપેન્દ્ર પટેલના નેતૃત્વ અને માર્ગદર્શનમાં 10મી વાઈબ્રન્ટ ગુજરાત ગ્લોબલ સમિટના ભાગરૂપે અમદાવાદમાં ગુજરાત સ્પોર્ટ્સ સ્ટાર્ટઅપ કોન્કલેવનું આયોજન થયું છે. ગુજરાત અને ભારતભરના રમત-ગમત ક્ષેત્ર સાથે સંકળાયેલા આંત્રપ્રિન્યોર્સને પ્રોત્સાહન અને સમર્થન આપવાના ઉદ્દેશ સાથે ગુજરાત સમગ્ર દેશમાં આ પ્રકારની સ્પોર્ટ્સ સ્ટાર્ટઅપ કોન્કલેવનું આયોજન કરનાર પ્રથમ રાજ્ય પણ બન્યું છે. એટલું જ નહિ દેશના વિવિધ સ્પોર્ટ્સ ક્ષેત્ર સાથે સંકળાયેલા લોકોએ આ કોન્કલેવમાં ઉત્સાહપૂર્વક ભાગ લીધો છે, એ આ સ્પોર્ટ્સ સ્ટાર્ટઅપ કોન્કલેવની પણ સફળતા દર્શાવે છે.
ગુજરાત સ્પોર્ટ્સ સ્ટાર્ટઅપ કોન્ક્લેવ અંગે વાત કરતા રમત ગમત મંત્રીશ્રીએ કહ્યું કે, આ કોન્ક્લેવ સ્પોર્ટ્સ સ્ટાર્ટઅપ ક્ષેત્રમાં ઈનોવેશનને પ્રોત્સાહિત કરવા માટેનું એક શ્રેષ્ઠ માધ્યમ બન્યું છે. આ કોન્ક્લેવમાં પિચબુક સ્પર્ધાના શોર્ટલિસ્ટેડ સ્ટાર્ટઅપ્સને રાજ્ય સરકાર તરફથી રૂ. 25 લાખના આકર્ષક રોકડ પુરસ્કારો આપવામાં આવશે, જેનાથી સ્પોર્ટ્સ સ્ટાર્ટઅપ ક્ષેત્ર સાથે સંકળાયેલા આંત્રપ્રિન્યોર્સને ખૂબ પ્રોત્સાહન મળશે, એવું તેમણે ઉમેર્યું હતું. વધુમાં કહ્યું કે, ગુજરાત રાજ્ય સ્પોર્ટ્સના આવા વ્યાપક આયોજન કરવામાં એક પછી એક મોટી સફળતા હાંસલ કરી છે, જેનું તાજું ઉદાહરણ તાજેતરમાં જ ગુજરાતમાં આયોજિત નેશનલ ગેમ્સ પણ છે. રાજ્ય સરકારના સ્પોર્ટ્સ વિભાગે માત્ર 100 દિવસની ચેલેન્જ સ્વીકારીને આ નેશનલ ગેમ્સનું સફળતાપૂર્વક આયોજન કર્યું હતું.
સ્પોર્ટ્સ પોલીસી અંગે વાત કરતા હર્ષ સંઘવીએ કહ્યું કે, રાજ્ય સરકાર સ્પોર્ટ્સ પોલીસીમાં પણ મોટા ફેરફાર લાવી રહી છે. સ્પોર્ટ્સ ક્ષેત્રને અનુરૂપ ટૂંક સમયમાં નવી સ્પોર્ટ્સ પોલીસી પણ જાહેર કરવામાં આવશે. આ પોલીસીથી સ્પોર્ટ્સ સ્ટાર્ટઅપ ક્ષેત્ર સાથે સંકળાયેલા તેમજ ખેલાડીઓને ખૂબ પ્રોત્સાહન મળશે, એવો વિશ્વાસ પણ શ્રી હર્ષભાઈ સંઘવીએ વ્યક્ત કર્યો હતો. ખેલાડીઓની મળતી સુવિધાઓમાં પણ બદલાવ લાવવા રાજ્ય સરકાર તમામ પ્રકારના પ્રયાસો કર્યા છે. ખેલાડીઓને કોઈ પણ પ્રકારની નાની તકલીફ લઈને મંત્રી સુધી ન આવવું પડે અને તાત્કાલિક તેનું નિરાકરણ થઈ જાય તેવા પ્રકારનું આયોજન રાજ્ય સરકારે કર્યું છે.
શક્તિ દૂત યોજના અંગે વાત કરતા મંત્રીએ કહ્યું કે, શકિત દૂત યોજનામાં પણ મોટા ફેરફારો કરવામાં આવી રહ્યા છે. અમે રાજ્યના બે લાખથી વધુ ખેલાડીઓને ઈ-મેલ મારફતે શક્તિ દૂધ યોજનામાં કેવા પ્રકારના બદલાવ કરવા જોઈએ, એ માટેના સૂચનો મંગાવ્યા હતા. જેમાં 80 ટકાથી વધુ સૂચનોનો આ યોજનામાં અને પોલીસીમાં સમાવેશ કરવામાં આવ્યો છે. આમ, આવનારા સમયમાં નવા બદલાવ સાથે શક્તિ દૂત યોજના લોન્ચ કરવામાં આવશે. કાર્યક્રમનાં અંતમાં હર્ષ સંઘવીએ કહ્યું કે, હવે સ્પોર્ટ્સ માત્ર ખુશી અને ફિટનેસ સાથે સંકળાયેલું ક્ષેત્ર નથી રહ્યું પણ આજે સ્પોર્ટ ક્ષેત્ર અનેક લોકોને રોજગારી આપતું પ્લેટફોર્મ પણ બની ગયું છે.
આ અવસરે સ્વાગત પ્રવચન આપતા રાજ્યના ખેલ વિભાગના અગ્ર સચિવ અશ્વિનીકુમારે કહ્યું કે, છ મહિના અગાઉ દેશના સ્પોર્ટ્સ મિનિસ્ટરની એક કોન્ફરન્સમાં સ્પોર્ટ્સ સ્ટાર્ટઅપ કોન્કલેવનો એક વિચાર મૂકવામાં આવ્યો હતો. ત્યારબાદ મુખ્યમંત્રી શ્રી ભૂપેન્દ્રભાઈ પટેલના માર્ગદર્શનમાં રાજ્ય સરકારે સમગ્ર દેશમાં પ્રથમવાર આ પ્રકારની કોન્કલેવનું આયોજન કરીને એક સફળતા હાંસિલ કરી છે. એટલું જ નહીં સ્પોર્ટ્સ ક્ષેત્ર સાથે સંકળાયેલા આંત્રપ્રિન્યોર્સને એક મોટું પ્લેટફોર્મ પણ મળ્યું છે. તેમણે વધુમાં ઉમેર્યું હતું કે, આ આયોજનમાં સ્પોર્ટ્સ ઓથોરિટી ઓફ ગુજરાત, ટ્રાન્સસ્ટેડિયા યુનિવર્સિટી, સ્પોર્ટ્સકોમ, આઇ-હબ અને સ્ટાર્ટઅપ ઈન્ડિયા જેવી સંસ્થાઓનો ખૂબ મોટો સહયોગ મળ્યો છે.
કોણ છે મોહન યાદવ? મધ્યપ્રદેશના નવા CM બનશે, ભાજપ પોતાના નિર્ણયથી બધાને આશ્ચર્યચકિત કરી દીધા
આ સ્પોર્ટ્સ સ્ટાર્ટઅપ કોન્કલેવમાં સ્પોર્ટ્સ ઓથોરિટી ઓફ ગુજરાતના ડાયરેક્ટર જનરલ શ્રી આર.એસ. નીનામા, ટ્રાન્સસ્ટેડિયા યુનિવર્સિટીના ફાઉન્ડર અને ચેરમેન શ્રી ઉદિત શેઠ, આઇઓસીના સિનિયર વાઈસ પ્રેસિડેન્ટ અજયભાઈ પટેલ, સ્પોર્ટ્સ ઓથોરિટી ઓફ ગુજરાતના અધિકારીઓ, સ્પોર્ટ્સ ઇન્ડસ્ટ્રીઝ સાથે તેમજ સ્ટાર્ટ અપ ક્ષેત્ર સાથે સંકળાયેલા આંત્રપ્રિન્યોર્સ ખૂબ મોટી સંખ્યામાં ઉપસ્થિત રહ્યા હતા.