ગાંધીનગર ખાતે ગૃહ રાજ્યમંત્રી હર્ષ સંઘવીની ઉપસ્થિતિ નેહરૂ યુવા કેન્દ્ર સંગઠન અને ગુજરાત રાજ્ય દ્વારા રાજ્યકક્ષાના યુવા ઉત્સવનો સમાપન સમારંભ યોજાયો હતો. ગૃહ રાજ્ય મંત્રી હર્ષ સંઘવીએ નેહરુ યુવા કેન્દ્ર સંગઠન દ્વારા યોજાયેલ રાજ્ય કક્ષાના યુવા ઉત્સવમાં જણાવ્યું હતું કે, પોતાના સુવર્ણ ભવિષ્ય માટે સપના જોવા તે યુવાનોનો અધિકાર છે, પરંતુ કોઈ પણ સપના અથાગ મહેનત વગર સાકાર થતા નથી.
રાજ્ય કક્ષાના યુવા ઉત્સવના સમાપન સમારંભમાં ઉપસ્થિત યુવક સેવા અને સાંસ્કૃતિક પ્રવૃત્તિ વિભાગના રાજ્ય મંત્રી હર્ષ સંઘવીએ વધુમાં ઉમેર્યું હતું કે, એક સપન પૂર્ણ થયા બાદ જ બીજું સપનું જોવું જોઈએ. યુવાનોને જીવનમાં સમય મળે ત્યારે માટી સાથે રમવાની રમત અવશ્ય રમવી જોઈએ. માટી સાથે રમત રમવાથી જીવનમાં શું શું ફાયદા થાય છે, તેની દષ્ટાંત પૂર્વક વાત કરી હતી. યુવાનોને સમાજના નાના-મોટા કામોમાં હંમેશા સહભાગી બનવા અને કોઈપણ વ્યક્તિને મદદરૂપ થવા હંમેશા તત્પર રહેવા અપીલ કરી હતી.
સાથે હર્ષ સંધવીએ યુવાનોને સરકારની વિવિધ યોજનાઓ જેવી કે આયુષ્યમાન ભારત કાર્ડ, ઉજ્વલા યોજના જેવી યોજનાઓની લોકોને સમજ આપી, આ યોજનાઓનો લાભ કેવી રીતે મેળવી શકાય તેવી મદદ કરીને પણ ઉમદા રાષ્ટ્રના નિર્માણમાં સહભાગી થઈ શકો છો તેમ પણ જણાવ્યું હતું. સાથે ચૂંટણી લડીને જ નેતા બની શકાય તેવું નથી, એવું કહી મંત્રીએ ઉમેર્યું હતું કે, તમે જે ક્ષેત્રમાં કામ કરો છો, ત્યાં કોઈને મદદરૂપ થાવ, કોઈનું જીવન બદલી શકો અને કોઈ વ્યક્તિને સાચો માર્ગ બતાવી લોકોના દિલમાં સ્થાન મેળવી શકો તો આપ સાચા નેતા જ છો.
આ કાર્યક્રમમાં મંત્રીએ યુવાનોને પાસેથી તેઓ પોતાના જીવનમાં શું કરવા માંગે છે, તેમની પાસે જાણી હતી.યુવાનોને એક સપના સાકાર થયા પછી અટકી ન જવાની પણ અપીલ કરી હતી. ગાંધીનગરના આંગણે યોજાયેલ બે દિવસીય રાજ્યકક્ષાના યુવા ઉત્સવમાં ગુજરાત રાજ્યના 33 જિલ્લાઓ અને ત્રણ કેન્દ્રશાસિત પ્રદેશ દિવ, દમણ અને સેલવાસમાંથી 600 જેટલા યુવાનો સહભાગી થયા હતા. બે દિવસ દરમિયાન યુવાનો માટે મોબાઈલ ફોટોગ્રાફી, વકૃત્વ, કાવ્ય લેખન અને ચિત્ર સ્પર્ધા સાથે ગ્રુપ ડાન્સ જેવા કાર્યક્રમોનું આયોજન કરવામાં આવ્યું હતું. સાથે સાથે યુવાનોના જનરલ નોલેજ વધારવા માટે ક્વિઝ સ્પર્ધા પણ યોજવામાં આવી હતી.
ભગવંત માનની ભૂંડી આદત તેની દિકરીએ જ છતી કરી, કહ્યું-પપ્પાએ ભાવનાત્મક અને શારીરિક શોષણ કર્યું
સમાપન સમારોહમાં નેહરુ યુવા કેન્દ્ર સંગઠન ગુજરાત રાજ્યના સ્ટેટ ડિરેક્ટર મનીષા શાહે મહાનુભાવોનો શાબ્દિક સ્વાગત કર્યું હતું. આ સમગ્ર કાર્યક્રમને સફળ બનાવવા માટે નહેરુ યુવા કેન્દ્ર સંગઠન, ગુજરાતના ડેપ્યુટી સ્ટેટ ડિરેક્ટર દુષ્યત ભટ્ટ અને ગાંધીનગર જિલ્લાના સંયોજક પંકજ મરેચા અને રાજ્યના વિવિધ જિલ્લા સંગઠનોના પ્રતિનિધિઓએ ભારે જહેમત ઉઠાવી હતી. આ કાર્યક્રમમાં વિવિધ જિલ્લાઓમાંથી ઉત્સાહભેર યુવાનો સહભાગી બન્યા હતા.