India News : પર્વતો પૂર સામે ઝઝૂમી રહ્યા છે. હિમાચલ પ્રદેશ (Himachal Pradesh) અને ઉત્તરાખંડમાં (Uttarakhand) ભારે વરસાદને કારણે નદીઓ છલકાઈ રહી છે. પર્વતો પડી રહ્યા છે. બધે જ ભૂસ્ખલનથી વિનાશ જોવા મળી રહ્યો છે. આકાશી હોનારતથી સર્વત્ર હાહાકાર મચી ગયો છે. ભારતના આ બે પર્વતીય રાજ્યોમાં ચોમાસું તબાહી લાવ્યું છે. હિમાચલમાં 24 જૂનથી અત્યાર સુધીમાં 214 લોકોના મોત થયા છે. જ્યારે 38 લોકો લાપતા છે. રાજ્યમાં વરસાદ-ભૂસ્ખલનને લગતી ઘટનાઓમાં 10,000થી વધુ મકાનોને નુકસાન પહોંચ્યું છે. તે જ સમયે, ચોમાસાના આગમન પછી ઉત્તરાખંડમાં 52 લોકોનાં મોત નીપજ્યાં છે. જ્યારે 19 લોકો લાપતા છે. રાજ્યને ૬૫૦ કરોડનું નુકસાન થયું છે.
હિમાચલમાં 3 દિવસથી તબાહી યથાવત
હિમાચલમાં રવિવારથી ભારે વરસાદ ચાલુ છે. આ કારણે શિમલા, સોલન સહિત ઘણા જિલ્લાઓમાં ભૂસ્ખલન થયું હતું. શિમલામાં સમર હિલ, ફુગલી અને કૃષ્ણાનગરમાં ભૂસ્ખલનની સૌથી વધુ અસર થઈ હતી. રાજ્યમાં વરસાદ અને ભૂસ્ખલનના કારણે ત્રણ દિવસમાં 71 લોકોના મોત થયા છે. જ્યારે 13 લોકો લાપતા છે.
વરસાદ, પૂર અને ભૂસ્ખલનને કારણે રાજ્યના ઇન્ફ્રાસ્ટ્રક્ચરને ભારે નુકસાન થયું છે. સીએમ સુખવિંદર સિંહ સુખૂએ ઈન્ફ્રાસ્ટ્રક્ચરના પુનઃનિર્માણના કામને પહાડ જેવો પડકાર ગણાવ્યો હતો. હિમાચલ પ્રદેશના મુખ્યમંત્રી સુખુ ખટ્ટરે કહ્યું કે આ ચોમાસામાં ભારે વરસાદને કારણે રાજ્યને લગભગ 10,000 કરોડ રૂપિયાનું નુકસાન થયું છે. વરસાદ અને ભૂસ્ખલનને કારણે નાશ પામેલા ઇન્ફ્રાસ્ટ્રક્ચરને ફરીથી બનાવવામાં એક વર્ષનો સમય લાગશે. “રસ્તાઓ અને પાણીના પ્રોજેક્ટ્સના પુનર્નિર્માણમાં સમય લાગે છે. પરંતુ અમે પ્રક્રિયાને ઝડપી બનાવી રહ્યા છીએ.
સીએમ સુખુએ કહ્યું કે સેના, વાયુસેના, એનડીઆરએફ અને એસડીઆરએફ પૂર પ્રભાવિત વિસ્તારોમાંથી લોકોને બહાર કાઢવામાં લાગેલા છે, આ પ્રક્રિયામાં પોલીસ અને હોમગાર્ડના જવાનો પણ સામેલ થયા છે.
કૃષ્ણનગરમાં 15 મકાનો ખાલી
મંગળવારે કૃષ્ણનગરમાં ભૂસ્ખલનમાં એક પછી એક 8 જેટલા મકાનો ધરાશાયી થયા હતા. તેનો વીડિયો પણ સામે આવ્યો હતો. ભૂસ્ખલનમાં બે લોકોના મોત થયા છે. આ વિસ્તારમાં વરસાદને કારણે ભૂસ્ખલનની સંભાવનાને કારણે ૧૫ જેટલા મકાનો ખાલી કરાવીને લોકોને સલામત સ્થળે ખસેડવામાં આવ્યા છે.
19 ઓગસ્ટ સુધી શાળા-કોલેજો બંધ રહેશે
શિક્ષણ વિભાગે 19 ઓગસ્ટ સુધી રાજ્યની તમામ શાળા- કોલેજો અને શૈક્ષણિક સંસ્થાઓ બંધ કરી દીધી છે. ભૂસ્ખલનને કારણે રાજ્યભરમાં રસ્તાઓને નુકસાન થયું હતું, એમ અધિકારીઓએ જણાવ્યું હતું. રાજ્યમાં 24 જૂને ચોમાસાની શરૂઆત થઈ ત્યારથી અત્યાર સુધીમાં રાજ્યમાં 800 જેટલા રસ્તાઓ બંધ છે અને 10,714 મકાનોને સંપૂર્ણ અથવા આંશિક નુકસાન થયું છે.
ડેપ્યુટી સીએમ મુકેશ અગ્નિહોત્રીએ કેન્દ્રને અપીલ કરી છે કે હિમાચલ પ્રદેશમાં રાષ્ટ્રીય આપત્તિ જાહેર કરવામાં આવે અને પુન:સ્થાપનના કામો માટે 2,000 કરોડ રૂપિયા રિલીઝ કરવામાં આવે. છેલ્લા 24 કલાકમાં કાંગડા જિલ્લાના ઈન્દોરા અને ફતેહપુરમાં પૂર પ્રભાવિત વિસ્તારોમાંથી 1731 લોકોને બચાવવામાં આવ્યા છે.
હિમાચલમાં વરસાદે તોડ્યો 50 વર્ષનો રેકોર્ડ
હવામાન વિભાગના જણાવ્યા અનુસાર હિમાચલ પ્રદેશમાં આ વર્ષે ચોમાસાના 54 દિવસમાં 742 મીમી વરસાદ થયો છે, જ્યારે 1 જૂનથી 30 સપ્ટેમ્બર વચ્ચે મોસમની સરેરાશ 730 મીમી વરસાદ થયો છે. શિમલા હવામાન કેન્દ્રના ડિરેક્ટર સુરિન્દર પોલે જણાવ્યું હતું કે આ જુલાઈમાં રાજ્યમાં નોંધાયેલા વરસાદે છેલ્લા ૫૦ વર્ષના તમામ રેકોર્ડ તોડી નાખ્યા છે. આ પહેલા જુલાઇમાં હિમાચલના મંડી, કુલ્લુ, શિમલામાં વરસાદ અને પૂરના કારણે ભારે વિનાશ થયો હતો. આ તબાહીમાં સેંકડો રસ્તાઓ, પુલો અને ઇન્ફ્રાસ્ટ્રક્ચરને નુકસાન પહોંચ્યું હતું.
એનડીઆરએફે 10,000 લોકોને સુરક્ષિત સ્થળે ખસેડ્યા
એનડીઆરએફએ બુધવારે જણાવ્યું હતું કે, ભારે વરસાદ અને પૂરથી પ્રભાવિત હિમાચલ પ્રદેશ, ઉત્તરાખંડ અને પંજાબના વિસ્તારોમાં 960 થી વધુ લોકોને બચાવવામાં આવ્યા છે, જ્યારે 10,000 થી વધુ લોકોને સલામત સ્થળોએ ખસેડવામાં આવ્યા છે. આ રાજ્યોમાં એનડીઆરએફની 29 ટીમો તૈનાત છે. જ્યારે 14ને સ્ટેન્ડબાયમાં રાખવામાં આવ્યા છે.
ઉત્તરાખંડમાં વરસાદે મચાવી તબાહી
ઉત્તરાખંડમાં પણ ચોમાસાના વરસાદે ભારે તબાહી મચાવી છે. ચોમાસાના આગમન બાદ અત્યાર સુધીમાં રાજ્યમાં 52 લોકોના મોત થયા છે. જ્યારે 37 લોકો ઘાયલ થયા છે. 19 લોકો લાપતા છે. ઉત્તરાખંડમાં પણ સોમવારથી ભારે વરસાદ પડી રહ્યો છે. સોમવારથી અત્યાર સુધીમાં રાજ્યમાં 6 લોકોના મોત થયા છે. ઉત્તરાખંડમાં 19 ઓગસ્ટ સુધી ઘણી જગ્યાએ યલો એલર્ટ જાહેર કરવામાં આવ્યું છે. પૂર અને ભૂસ્ખલનથી પ્રભાવિત વિસ્તારોમાં લોકોને બહાર ન નીકળવાની ચેતવણી આપવામાં આવી છે. એટલું જ નહીં હરિદ્વારમાં ગંગાનું જળસ્તર ખતરાના નિશાનથી થોડું જ નીચે રહ્યું છે. ઋષિકેશમાં ગંગાના પાણીથી ઘાટના કિનારે આવેલા વિસ્તારોમાં પાણી ભરાઈ ગયા હતા.
રણબીરના કારણે આલિયા નથી કરતી લિપસ્ટિક! અભિનેત્રીએ ખુદ ખુલાસો કર્યો-રણબીરને કોરા હોઠમાં જ મજ્જા આવે…
200 કરોડનો આંકડો પાર કર્યા બાદ સની દેઓલ અને ટીમ ફૂલ મોજમાં, જુઓ પ્રાઈવેટ જેટના અંદરનો વીડિયો
દહેરાદૂનના વિકાસનગર તહસીલના લંઘા જાખન ગામમાં ભૂસ્ખલનમાં ઓછામાં ઓછા ૧૫ મકાનો નાશ પામ્યા હતા. જો કે, જાનમાલનું કોઈ નુકસાન થયું નથી. ઉત્તરાખંડના રુદ્રપ્રયાગ જિલ્લામાં એક પુલ ધરાશાયી થતાં સેંકડો શ્રદ્ધાળુઓ મડમહેશ્વર મંદિરમાં ફસાયા હતા. તમામ ૨૯૩ યાત્રાળુઓને બચાવી લેવામાં આવ્યા છે. જેમાંથી 240 તીર્થયાત્રીઓને એરલિફ્ટ કરવામાં આવ્યા હતા. જ્યારે 53ને રોપ રિવર ક્રોસીંગની મદદથી બહાર કાઢવામાં આવ્યા હતા.