અમદાવાદ શહેરના સાબરમતી રિવરફ્રન્ટ પર મંગળવારે રાત્રે એક ઘટના બનવા પામી હતી. એક સગીરા તેની બહેનપણી સાથે રિવરફ્રન્ટ પર ફરવા આવી હતી. ત્યારે ત્યાં હાજર એક યુવકે આ સગીરાને જણાવ્યું હતું કે કોઇ શખ્સ દૂરથી તેમની જાણ બહાર ફોટો પાડી રહ્યો છે. જેથી આ સગીરાએ તે શખ્સ પાસે જઇને ફોન તપાસતા તેમાંથી ફોટો મળી આવ્યા હતા. જેથી સગીરાએ તે ફોટો ડિલિટ કરી નાખી પોલીસને જાણ કરી હતી.
બીજીતરફ બજરંગદળને ઘટનાની જાણ થતાં મોટી સંખ્યામાં કાર્યકર્તાઓ ત્યાં આવી પહોંચ્યા હતા. જેથી પોલીસે યુવક સામે ગુનો નોંધ્યો હતો પણ અનેક વાર રજૂઆત કરી હોવા છતાં પોલીસે પોક્સોની કલમ ન લગાવી હોવાનો આક્ષેપ પણ લાગી રહ્યા છે.
મૂળ ભાવનગરની અને હાલ અમદાવાદના રાણીપ વિસ્તારમાં રહેતી 17 વર્ષીય સગીરા આઠેક દિવસથી તેની બહેનપણી સાથે રહે છે. સગીરા એલડી આર્ટ્સ કોલેજમાં અભ્યાસ કરે છે અને કોલેજમાં મિટિંગ હોવાથી તે અમદાવાદ આવી હતી. તેના માતા-પિતા સુરતમાં રહે છે અને પિતા હાલ ડાયમંડના વેપાર માટે રશિયા ગયા છે. મંગળવારે આ સગીરા તેની બહેનપણી સાથે રિવરફ્રન્ટ ફરવા ગઇ હતી. રિવરફ્રન્ટ પશ્ચિમના ભાગે પાળી પર સગીરા તેની બહેનપણી સાથે બેઠી હતી ત્યારે તેની બહેનપણીના ચશ્મા નીચે વોકવે પર પડી જતા લેવા ગઇ હતી. ત્યાં યશ રાજપૂત નામનો એક યુવક આ સગીરા પાસે આવ્યો અને ત્યાં હાજર એક શખ્સે જાણબહાર તેમના ફોટો પાડ્યા હોવાનું જણાવ્યુ હતુ.
આ સાંભળી સગીરાએ તેની બહેનપણીને બોલાવી હતી અને તે શખ્સ પાસે જઇને તેનો ફોન માંગી તપાસ કરતા સગીરાના ફોટો મળી આવ્યા હતા. જેથી સગીરાએ તે ફોટો ડિલીટ કરી પોલીસને બોલાવતા પોલીસ અને અભયમની ટીમ ત્યાં આવી પહોંચી હતી. પોલીસ આ સગીરા અને ફોટો પાડનાર શખ્સને પોલીસ સ્ટેશન લાવી તે શખ્સનું નામ પૂછતા મોહમ્મદ અલમાસ ઇકરાર કુરેશી (ઉ.19, રહે. જયરામની ચાલી, રાણીપ બકરામંડી) હોવાનું સામે આવ્યુ હતુ.
બીજીતરફ ઘટનાની જાણ થતાં બજરંગદળના મોટી સંખ્યામાં કાર્યકર્તાઓ પણ ત્યાં આવી પહોંચ્યા હતા. જેથી પોલીસે આરોપી મોહમદ અલમાસ ઇકરાર કુરેશી સામે ગુનો નોંધી તપાસ હાથ ધરી હતી. જોકે પોલીસ પર આક્ષેપ લાગી રહ્યો છે કે પોલીસે આ ઘટનામાં ભોગ બનનાર સગીરા હોવા છતાં પોક્સોની કલમ ન લગાવી હોવાનો આક્ષેપ કર્યો છે.