World News: છેલ્લા કેટલાય દિવસોથી આખા વિશ્વમાં ઈઝરાયેલ હમાસનું યુદ્ધ વિશે ચર્ચાઓ ચાલી રહી છે. ત્યારે હવે આ મામલે એક નવું અપડેટ સામે આવ્યું છે. ઇઝરાયેલ સરકારે હમાસ દ્વારા બંધક બનાવવામાં આવેલી 50 મહિલાઓ અને બાળકોની મુક્તિના બદલામાં 150 પેલેસ્ટિનિયન મહિલા અને સગીર કેદીઓને જેલમાંથી મુક્ત કરવા સાથે 4 દિવસના યુદ્ધવિરામને મંજૂરી આપી છે.
ઇઝરાયેલના વડા પ્રધાન બેન્જામિન નેતન્યાહુના કાર્યાલયે જણાવ્યું હતું કે ઇઝરાયેલી સરકારે ગાઝામાં બંધક તરીકે રાખવામાં આવેલી 50 મહિલાઓ અને બાળકોને મુક્ત કરવા માટે પેલેસ્ટિનિયન હમાસ આતંકવાદીઓ સાથેની ડીલને સમર્થન આપ્યું હતું. બદલામાં ઇઝરાયેલ સુરક્ષા ગુનાઓ માટે તેની જેલમાં બંધ 150 પેલેસ્ટિનિયન મહિલાઓ અને સગીરોને મુક્ત કરશે. એવા લોકોને મુક્ત કરવામાં આવશે જેમના પર કોઈ ઘાતક આતંકવાદી હુમલામાં સામેલ હોવાનો સીધો આરોપ નહીં હોય.
આ ડીલના વ્યાપક માળખા હેઠળ તે 96 કલાક દરમિયાન લડાઈ અટકાવવાના બદલામાં પ્રથમ ચાર દિવસમાં 50 બંધકોને મુક્ત કરવામાં આવશે. હમાસ દ્વારા લગભગ 40 બાળકો અને 13 માતાઓને બંધક બનાવવામાં આવી છે. મંજૂર થયેલી ડીલમાં 30 બાળકો, આઠ માતાઓ અને 12 અન્ય મહિલાઓની મુક્તિનો સમાવેશ થાય છે. તે દિવસોમાં 50 બંધકોને એકસાથે નહીં પરંતુ નાના જૂથોમાં છોડવામાં આવશે. જો આગામી ચાર દિવસ સુધી લડાઈ રોકવામાં આવે તો ગાઝામાં રાખવામાં આવેલા બાકીના 30 બંધકોને મુક્ત કરવામાં આવે તેવી શક્યતા છે. રીલીઝ માટે સુનિશ્ચિત થયેલ તમામ લોકો જીવિત છે અને તેમની પાસે ઇઝરાયેલની નાગરિકતા છે.
કતારના અધિકારીઓ ઇઝરાયેલ અને હમાસ વચ્ચેના કરારમાં મધ્યસ્થી કરી રહ્યા છે. પીએમ નેતન્યાહુએ કહ્યું કે યુએસ પ્રમુખ જો બિડેને કરાર સુધી પહોંચવામાં મદદ કરી જેથી તેમાં વધુ બંધકો અને કેટલીક છૂટછાટોનો સમાવેશ થાય. છેલ્લા દોઢ મહિનાથી ગાઝા પર ઈઝરાયેલના સતત હુમલા બાદ આ પ્રથમ યુદ્ધવિરામ હશે. આ યુદ્ધવિરામના કારણે ગાઝા સુધી માનવીય સહાય પણ પહોંચી શકશે. જો કે, આ યુદ્ધવિરામ ક્યારે અમલમાં આવશે તે સ્પષ્ટ નથી. એવી અપેક્ષા છે કે ગુરૂવારથી બંધકોને મુક્ત કરવામાં આવશે. ઇઝરાયેલી સરકારે કહ્યું કે તે મુક્ત કરાયેલા દરેક 10 બંધકો માટે એક વધારાનો દિવસ શાંતિ લંબાવશે.
ઉલ્લેખનીય છે કે 7 ઓક્ટોબરે ઈઝરાયેલ પર હુમલો કર્યા બાદ હમાસે લગભગ 240 લોકોને બંધક બનાવી લીધા હતા. આ બંધકો મુખ્યત્વે એવા લોકો હતા જેઓ સંગીત સમારોહમાં ભાગ લીધો હતો. જેને હમાસના આતંકી હુમલાનું નિશાન બનાવવામાં આવ્યો હતો. ઈઝરાયેલ સરકારે કહ્યું છે કે ઈઝરાયેલના નાગરિકો ઉપરાંત અડધાથી વધુ બંધકો પાસે અમેરિકા, થાઈલેન્ડ, બ્રિટન, ફ્રાન્સ, આર્જેન્ટિના, જર્મની, ચિલી, સ્પેન અને પોર્ટુગલ સહિત લગભગ 40 દેશોના વિદેશી અને દ્વિ નાગરિકત્વ છે.