World news: જ્યારે પેલેસ્ટિનિયન ઉગ્રવાદી સંગઠન હમાસે ઈઝરાયલ પર ઑક્ટોબર 7 ના રોજ હુમલો કર્યો અને 1,400 થી વધુ લોકોની હત્યા કરી, ત્યારે ગાઝા પર આક્રમણ કરવાનો પ્રસ્તાવ લગભગ તરત જ ઉભો થયો. ઇઝરાયેલનો જમીની હુમલો થોડા દિવસોમાં શરૂ થવાની ધારણા હતી. પરંતુ ઇઝરાયેલ-હમાસ યુદ્ધ શરૂ થયાને બે અઠવાડિયાથી વધુ સમય થઈ ગયો છે અને – સરહદ પર હમાસ લડવૈયાઓ અને ઇઝરાયેલી દળો વચ્ચેની અથડામણો સિવાય – ઇઝરાયેલી સૈન્યએ ગાઝાની અંદર હજુ સુધી નોંધપાત્ર આક્રમણ કર્યું નથી. ઇઝરાયલના વડાપ્રધાન બેન્જામિન નેતન્યાહુ ગાઝા પર જમીની હુમલામાં વિલંબ કેમ કરી રહ્યા છે તેની પાછળ નિષ્ણાતોએ ઘણા કારણો આપ્યા છે.
અમેરિકન અધિકારીઓને ટાંકીને અહેવાલમાં કહેવામાં આવ્યું છે કે જો બિડેન પ્રશાસને ઇઝરાયલને ગાઝા પર તેના ગ્રાઉન્ડ હુમલામાં વિલંબ કરવાની સલાહ આપી છે. જેથી આ વિસ્તારમાં અમેરિકન હિતો પર કોઈપણ હુમલાની તૈયારી કરવાનો અને બંધકોની મુક્તિ માટે સફળ વાટાઘાટો કરવાનો સમય મળી શકે. એક અમેરિકન અધિકારીને ટાંકીને અહેવાલમાં જણાવાયું છે કે યુએસ ડિફેન્સ ચીફ લોયડ ઓસ્ટિન ઇઝરાયેલને સૈન્ય સમર્થન અને મધ્ય પૂર્વ ક્ષેત્રમાં અમેરિકી સૈનિકોની તૈનાતી અંગે ચર્ચા કરવા ઇઝરાયેલી અધિકારીઓ સાથે લગભગ દરરોજ વાત કરે છે. તેમણે પ્રાથમિકતા તરીકે બંધકોને મુક્ત કરવાની પણ વાત કરી છે.
આ સાથે જણાવવામાં આવ્યું કે ઈઝરાયેલની મુલાકાત દરમિયાન રાષ્ટ્રપતિ જો બિડેને કોઈપણ હુમલા પહેલા ઘણા મહત્વપૂર્ણ પ્રશ્નોના જવાબ શોધવા પર ધ્યાન કેન્દ્રિત કર્યું હતું. આમાં ગાઝા પર કોણ કબજો કરશે, કેદીઓ પર ઓપરેશનની શું અસર થશે અને હમાસ અને હિઝબુલ્લાહ સામેના યુદ્ધના ઈઝરાયેલ માટે શું પરિણામ આવશે જેવા પ્રશ્નોનો સમાવેશ થાય છે.
એક અમેરિકી અધિકારીએ જણાવ્યું કે અમેરિકનોએ ગાઝામાં નાગરિકોના મૃત્યુ અને માનવતાવાદી સહાય અંગે પણ ચિંતા વ્યક્ત કરી છે. આ સાથે, ઈઝરાયેલના હુમલામાં વિલંબ થવાનું એક મોટું કારણ એ છે કે ઈઝરાયેલ ગાઝામાં હમાસના તમામ ઈન્ફ્રાસ્ટ્રક્ચરને સંપૂર્ણપણે નષ્ટ કરવા માટે હવાઈ હુમલાનો અસરકારક રીતે ઉપયોગ કરી રહ્યું છે.
ઇઝરાયેલ દરેક માધ્યમો, સંસાધન અને માળખાનો નાશ કરવા માંગે છે જેનો હમાસ લડવૈયાઓ ગેરિલા યુદ્ધ માટે સંભવિત રીતે ઉપયોગ કરી શકે. ઇઝરાયેલ બે અઠવાડિયાથી વધુ સમયથી ગાઝા પર બોમ્બમારો કરી રહ્યું છે અને હવાઈ હુમલામાં લગભગ 5,000 પેલેસ્ટિનિયનો માર્યા ગયા છે – જેમાંથી ઘણા બાળકો છે. નિષ્ણાતોએ જણાવ્યું હતું કે ગાઝા પટ્ટીમાં કોઈપણ સૈનિકો મોકલતા પહેલા, ઇઝરાયેલ શક્ય તેટલું ટનલ નેટવર્કને દૂર કરવાનો પ્રયાસ કરી રહ્યું છે, જેનો ઉપયોગ હમાસ પરિવહન માટે કરે છે. રવિવારે ગાઝામાં પ્રવેશવાનો પ્રયાસ કરતી વખતે નાના ઇઝરાયેલી સ્ટ્રાઇક ફોર્સને હમાસ તરફથી તાત્કાલિક પ્રતિકારનો સામનો કરવો પડ્યો હતો. ઈઝરાયેલે પુષ્ટિ કરી છે કે આ અથડામણમાં ઓછામાં ઓછો એક સૈનિક માર્યો ગયો હતો અને અન્ય કેટલાક ઘાયલ થયા હતા.
વધુ જાનહાનિ ટાળવા માટે ઇઝરાયલે તેના હવાઈ હુમલાને વધુ તીવ્ર બનાવ્યા છે. છેલ્લા 24 કલાકમાં બોમ્બ વિસ્ફોટોમાં 400 થી વધુ પેલેસ્ટાઈનના મોત થયા છે. મોટાભાગના આરબ દેશો, ખાસ કરીને ઈરાને સ્પષ્ટપણે કહ્યું છે કે ગાઝા પર ઈઝરાયેલી સૈનિકો દ્વારા કોઈપણ હુમલો ગંભીર જવાબી કાર્યવાહી કરશે.
હમાસ છેલ્લા 4 વર્ષથી ભયંકર હુમલાની તૈયારી કરી રહ્યું હતું, જાણો ઈઝરાયેલ પર એટેકની અંદરની કહાની
હમાસ સામે ઇઝરાયેલ આમ તો કેવી રીતે જીતશે? બુલેટપ્રૂફ જેકેટનો પણ અભાવ અને સેનાને બીજું પણ ઘણું ખૂટે છે
નિષ્ણાતોએ જણાવ્યું કે ઈઝરાયેલે ઉત્તર ગાઝાના 1.1 મિલિયન રહેવાસીઓને વિસ્તાર ખાલી કરવા માટે માત્ર 24 કલાકનો સમય આપ્યો હતો. તેના તીવ્ર આંતરરાષ્ટ્રીય વિરોધે ઇઝરાયેલી અધિકારીઓને તેમની સમયરેખા પર પુનર્વિચાર કરવાની ફરજ પાડી. ઘણા વૈશ્વિક સંગઠનોએ તો ઈઝરાયેલના આ પગલાને માનવતા વિરુદ્ધ ગુનો ગણાવવાનું શરૂ કર્યું.