જેને જોઈને આપણે મતદાન કરવાનું મન થાય એવા ઘણા કિસ્સાઓ સામે આવતા રહે છે. એવો જ એક કિસ્સા પાટણમાં પણ સામે આવ્યો છે. પાટણમાં મતદાન કરવા જતા વૃદ્ધા રેલિંગ પરથી નીચે પટકાઇ ગયા હતા. જોકે, હાજર સુરક્ષા કર્મચારીઓએ તુરંત ઉભા કર્યા હતા. વૃદ્ધાને ગંભીર ઇજાઓ પહોંચી હોવા છતાં તેમણે મતદાન કર્યું હતું. ત્યારબાદ 108 બોલાવીને તેમને સારવાર અર્થે ખસેડાયા હતા. આ કિસ્સો જોઈને ઘણા યુવાનો પણ શરમાઈ ગયા કે જેણે મતદાન કરવાનું ટાળવાનું વિચાર્યું હતું.
આવો એક બીજો કિસ્સો પણ ચર્ચામાં છે કે જેમાં દર્દી કિરીટભાઈ ખત્રીન છેલ્લા ઘણા સમયથી હોમ આઇશોલેશનમાં વેન્ટિલેટર પર હતા, છતાં મતદાન કરવાની ઇચ્છા પરિવાર સામે દર્શાવતા પરિવારે એમ્બ્યુલન્સ મતદાન મથકે લઇ જઇ મતદાન કરાવ્યું હતું.
એ જ રીતે વિસનગરના કિસ્સાની વાત કરીએ તો 72 વર્ષના વૃદ્ધાએ મતદાન કરીને કહ્યું હતું કે, ‘ઘસડીને લાવશો તો પણ મતદાન કરવા તો આવીશું, જીવીશ ત્યાં સુધી મતદાન તો કરીશ જ’, ગાંધીનગરની ઉત્તર બેઠક પર કેન્સર ગ્રસ્ત ચંદ્રિકાબેન ખીસડીયાએ 69 વર્ષની ઉંમરે સેક્ટર 20 મતદાન મથક પર મતદાન કર્યું હતું. ગાંધીનગરની ઉત્તર બેઠક પર દિવ્યાંગ દંપતી મુકેશ ભારતી જોશી અને આશાબેને મતદાન કરીને જણાવ્યું હતું કે, શારીરિક રીતે ભલે અશકત છીએ પણ અમને ખુશી છે કે અમારા મત થકી અમે દેશના ભવિષ્યમાટે મતદાન થકી એક નાનો આધાર બની રહ્યા છીએ. આનાથી વધારે ખુશીની વાત અમારા માટે બીજી કઈ હોય.
તો વળી આણંદ વિધાનસભા બેઠકો પર આણંદના બીમાર મતદારો પણ એમબ્યુલન્સ સાથે પોતાનું મત આપવા માટે અને પગે ચાલી ન શકાય તેવા પણ લોકો હાલ મતદાન મથકે પહોંચી પોતાનો મત આપવા પહોંચ્યા હતા.આણંદના વિવિધ મતદાન મથકોએ મોટી સંખ્યામાં મતદારોએ ઉત્સાહભેર મતદાન માટે લાઈન લગાવી હતી.