જૂનાગઢ જિલ્લામાં કોરોનાનું રસીકરણ 100 ટકા પૂર્ણ કરવા માટે ફિલ્મ સ્ટારોના નામે સર્ટિફિકેટ ઈશ્યૂ કરી દેવાના કોભાંડનો પર્દાફાશ થયો છે. જિલ્લાના ભેસાણ અને વિસાવદરના ગામડાઓમાં રસીકરણના સર્ટિફિકેટ મળ્યા છે. અહીંથી જુહી ચાવલા, જયા બચ્ચન, મહિમા ચૌધરીના નામના સર્ટિફિકેટ મળી આવ્યા છે. એવું કહેવામાં આવી રહ્યું છે કે, રસીકરણનો ટાર્ગેટ પૂર્ણ કરવા ફિલ્મી હસ્તીઓના નામે સર્ટિફિકેટ ઈશ્યૂ કરવામાં આવ્યા છે. આ સમાચાર સામે આવતાની સાથે જ આરોગ્ય વિભાગના અધિકારીઓ ઉંચાનીચા થઈ ગયા છે.
કોરોનામાં કેટલાય કૌભાંડ બહાર આવ્યા છે અને હવે છેક એક કૌભાંડ તો સામે આવ્યું. આ કૌભાંડ જોઈને આખું ગુજરાત ખડખડાટ હસી રહ્યું છે. ભાવનગરમાં વેક્સિન લીધા વગર એજન્ટો મારફત સર્ટિફિકેટ મેળવી લીધાનું કૌભાંડ ઝડપી લેવામાં આવ્યું હતું. જૂનાગઢ જિલ્લામાં રસીકરણનું એક કૌભાંડ બહાર આવ્યું છે. 100 ટકા પૂર્ણ કરવા માટે જુનાગઢમાં કેટલાય ફિલ્મ સ્ટારોના નામે સર્ટિફિકેટ ઈશ્યૂ કરી દેવામાં આવ્યા હતા અને હવે આ કોભાંડનો પર્દાફાશ થયો છે. ચારેકોર લોકોમાં એ જ ચર્ચા ચાલી રહી છે.
હવે લોકો કહી રહ્યા છે કે જુહી ચાવલા, જયા બચ્ચન, મહિમા ચૌધરીના નામના સર્ટિફિકેટ ગુજરાતમાંથી જ બન્યા છે તો શું આ લોકો ક્યારે ગુજરાત આવીને રસી લઈ ગયા. રસીકરણના આકડાં મોટા મોટા દર્શાવવા માટે આ લોકો કેટલી હદે જઈ શકે એનું આ ઉત્તમ ઉદાહરણ છે. જિલ્લાના વિસાવદર અને ભેસાણ તાલુકામાં રસી આપવામાં લાલિયાવાડી કરવામાં આવી છે. કોરોના રસીકરણનાં બોગસ સર્ટિફિકેટ ઈશ્યૂ કરવામાં આવ્યાં છે.
સર્ટિફિકેટના ઈશ્યુ પ્રમાણે વાત કરીએ તો જુહી ચાવલાએ મોટી મોણપરી ગામે રસીના ડોઝ લીધા છે. તો જયા બચ્ચને મેંદપરા પીએચસીમાં અને મહિમા ચૌધરીએ મેંદપરા પીએચસીમાં વેક્સિનના ડોઝ લીધા છે. આશ્ચર્યની વાત એ છે સ્થાનિક લોકોને રસી માટે લાઈનમાં ઊભું રહેવું પડતું હતું, ત્યારે જયા બચ્ચન, જુહી ચાવલા, મહિમા ચૌધરી જેવી જાણતી હસ્તીઓના નામે રસીના સર્ટિફિકેટ્સ ઇશ્યૂ કરી દેવામાં આવ્યાં હતાં.
ત્યારે હવે આ કૌભાંડમાં કોણ જવાબદાર છે એના નામ જલ્દી બહાર આવે અને કાર્યવાહી થાય એવી એક લોકમાંગણી જોવા મળી રહી છે.