કસ્ટમ ડ્યૂટીમાં ભારે કાપ અને તહેવારોને કારણે માંગમાં વધારો થવાને કારણે ઓગસ્ટમાં સોનાની આયાત બમણીથી વધુ વધીને $10.06 બિલિયનની વિક્રમી ટોચે પહોંચી છે. વાણિજ્ય મંત્રાલય દ્વારા જાહેર કરવામાં આવેલા આંકડા અનુસાર એક વર્ષ અગાઉના સમાન સમયગાળામાં સોનાની આયાત 4.93 અબજ ડોલર હતી. વાણિજ્ય સચિવ સુનિલ બર્થવાલે સોનાની આયાતના આ વિક્રમી સ્તર પર તેમની પ્રતિક્રિયામાં જણાવ્યું હતું કે સોનાની દાણચોરી અને અન્ય પ્રવૃત્તિઓને ઘટાડી શકાય તે માટે સોના પરની કસ્ટમ ડ્યુટીના દરમાં ભારે ઘટાડો કરવામાં આવ્યો છે.
“આ તે સમય છે જ્યારે જ્વેલર્સ તહેવારોની સિઝનમાં વેચાણ માટે તેમના માલનો સંગ્રહ કરવાનું શરૂ કરે છે,” બર્થવાલે પત્રકારોને અહીં જણાવ્યું હતું. નાણાકીય વર્ષ 2024-25ના બજેટમાં સરકારે ડ્યૂટી 15 ટકાથી ઘટાડીને છ ટકા કરવાની જાહેરાત કરી હતી. ચાલુ નાણાકીય વર્ષના પ્રથમ ચાર મહિનામાં (એપ્રિલ-જુલાઈ) ભારતની સોનાની આયાત 4.23 ટકા ઘટીને 12.64 અબજ ડોલર થઈ છે. ગત નાણાકીય વર્ષ 2023-24માં દેશની સોનાની આયાત 30 ટકા વધીને 45.54 અબજ ડોલર થઈ હતી.
સૌથી વધુ આયાત ક્યાંથી આવે છે?
ભારત સૌથી વધુ સોનાની આયાત સ્વિટ્ઝર્લેન્ડથી કરે છે, જેનો હિસ્સો લગભગ 40 ટકા છે. આ પછી સંયુક્ત આરબ અમીરાત (UAE) 16 ટકાથી વધુ શેર સાથે બીજા સ્થાને છે અને દક્ષિણ આફ્રિકા લગભગ 10 ટકા શેર સાથે ત્રીજા સ્થાને છે. દેશની કુલ આયાતમાં આ કિંમતી ધાતુનો હિસ્સો પાંચ ટકાથી વધુ છે.
જો તમારે 32 દાંત હોય તો રાજાની જેમ મળશે ત્રણેય લોકના સુખ! જાણો 28, 29 અને 30 વાળાનું શું થાય?
વેપાર ખાધ વધી
સોનાની આયાતમાં થયેલા વધારાને કારણે ઓગસ્ટમાં દેશની વેપાર ખાધ (આયાત અને નિકાસ વચ્ચેનો તફાવત) વધીને $29.65 બિલિયન થઈ ગઈ છે. ચીન પછી ભારત વિશ્વમાં સોનાનો બીજો સૌથી મોટો ગ્રાહક છે. આ આયાત મુખ્યત્વે જ્વેલરી ઉદ્યોગની માંગને સંતોષે છે.