મણિપુરની રાજધાની ઇમ્ફાલમાં રવિવારે ટોળા દ્વારા એમ્બ્યુલન્સને સળગાવી દેવામાં આવી ત્યારે કુકી પુરુષ સાથે લગ્ન કરનાર મૈતી મહિલા, તેના પુત્ર અને એક સંબંધીના મૃત્યુની આશંકા છે. પીડિતાના ગામના સંબંધીઓ અને રહેવાસીઓએ આ માહિતી આપી. હુમલો ત્યારે થયો જ્યારે એમ્બ્યુલન્સ બાળકને હોસ્પિટલ લઈ જઈ રહી હતી અને પોલીસ કર્મચારીઓ વાહનને એસ્કોર્ટ કરી રહ્યા હતા. આ ઘટના લામ્ફેલ પોલીસ સ્ટેશન વિસ્તાર હેઠળના ઇમ્ફાલ પશ્ચિમના ઇરોસેમ્બા વિસ્તારમાં બની હતી. સ્ટેશનના એક વરિષ્ઠ અધિકારીએ જણાવ્યું કે રવિવારે સાંજે લગભગ 7 વાગે વાહનમાં આગ લાગી હતી.
“અમે ફક્ત વાહનની અંદરથી કેટલાક હાડકાં જ મેળવી શક્યા છીએ,” આવું પોલીસે કહ્યું. આ કેસમાં તે જ રાત્રે પોલીસ દ્વારા એફઆઈઆર પણ નોંધવામાં આવી છે, જેમાં હત્યા સંબંધિત કલમોનો પણ સમાવેશ થાય છે. કાંગપોકપી જિલ્લાના કાંગચુપ ચિંગખોક ગામના રહેવાસીઓના જણાવ્યા અનુસાર, ત્રણેય મૃતકો મીના હેંગિંગ, તેનો પુત્ર ટોમશિંગ – જેમની ઉંમર 7 વર્ષથી ઓછી હોવાનું જણાવ્યું હતું – અને મીનાના સંબંધી લિડિયા લોરેમ્બમ છે.
કાંગચુપ વિસ્તારમાં ઘણા કુકી ગામો છે અને તે કાંગપોકપી જિલ્લાની સરહદ પર ઇમ્ફાલ પશ્ચિમમાં મૈતી ગામ ફાયેંગની નજીક છે. રાજ્યભરમાં હિંસાના બીજા મોજા બાદ 27 મેથી આ વિસ્તારમાં ભારે ગોળીબારની ઘટનાઓ જોવા મળી છે. પીડિતોના સંબંધી અને ગામના રહેવાસી જિન હેંગિંગના જણાવ્યા અનુસાર, ટોમશિંગ રિજનલ ઇન્સ્ટિટ્યૂટ ઑફ મેડિકલ સાયન્સ હોસ્પિટલમાં જઈ રહ્યા હતા, જ્યારે રવિવારે આ વિસ્તારમાં ગોળીબાર થયો ત્યારે તેને માથામાં ગોળી વાગી હતી.
આ પણ વાંચો
એક મહિના પહેલા મણિપુરમાં ફાટી નીકળેલી વંશીય હિંસામાં ઓછામાં ઓછા 98 લોકોએ જીવ ગુમાવ્યા છે અને 310 થી વધુ લોકો ઘાયલ થયા છે. હાલમાં રાજ્યમાં કુલ 37,450 લોકોએ 272 રાહત શિબિરોમાં આશ્રય લીધો છે. મણિપુરના પહાડી જિલ્લાઓમાં અનુસૂચિત જનજાતિ (ST)ના દરજ્જાની મૈતી સમુદાયની માગણીના વિરોધમાં ‘આદિવાસી એકતા કૂચ’નું આયોજન કરવામાં આવ્યા બાદ 3 મેના રોજ રાજ્યમાં પ્રથમ વખત જાતિ હિંસા નોંધાઈ હતી.