ભારતનું હવામાન ડખે ચડ્યું, ક્યાંક ધોધમાર વરસાદ તો ક્યાંક કરા પડ્યા, આ જગ્યાએ તો રેડ એલર્ટ આપી દીધું

India NEWS: વેસ્ટર્ન ડિસ્ટર્બન્સની અસરને કારણે ઉત્તર ભારત સહિત દેશના અનેક રાજ્યોમાં વરસાદ અને હિમવર્ષાના દ્રશ્યો જોવા મળી રહ્યા છે. સોમવારે રાત્રે રાજધાની દિલ્હીમાં વરસાદે હવામાનનો મૂડ બદલી નાખ્યો હતો, જ્યારે ચંદીગઢ અને ઉત્તર પ્રદેશના ઘણા વિસ્તારોમાં વીજળી ઠપ થઈ ગઈ હતી. પર્વતીય રાજ્યોમાં સ્થિતિ એવી છે કે હવામાન વિભાગે અહીં રેડ અને ઓરેન્જ એલર્ટ જાહેર કર્યું છે.

રાજધાની દિલ્હીમાં સોમવારે (19 ફેબ્રુઆરી) દિવસભર જોરદાર પવન ફૂંકાતાં વાતાવરણ ખુશનુમા રહ્યું હતું, ત્યારબાદ રાત્રે વરસાદ જોવા મળ્યો હતો. દિલ્હીમાં વરસાદ બાદ ફરી ઠંડી વધવાની આશંકા છે. આ સાથે IMD એ મંગળવારે દિવસભર વાદળછાયું આકાશ રહેવાની અને ઘણી જગ્યાએ ઝરમર ઝરમર વરસાદની સંભાવના વ્યક્ત કરી છે.

પંજાબ અને હરિયાણામાં કરાનું એલર્ટ

પંજાબ અને હરિયાણામાં ફરી એકવાર હવામાન બદલાયું છે. હવામાન વિભાગે હરિયાણાના કરનાલ, રોહતક, પંચકુલા, સોનીપત, અંબાલા, ઝજ્જર, કૈથલ, કુરુક્ષેત્ર, જીંદ, પાણીપત અને ઝજ્જરમાં ભારે પવનની સાથે સાથે અતિવૃષ્ટિનું ઓરેન્જ એલર્ટ આપવામાં આવ્યું છે. હવામાન વિભાગે પંજાબના 17 જિલ્લામાં વરસાદનું એલર્ટ જાહેર કર્યું છે. આ સાથે 5 જિલ્લામાં કરા પડવાની ચેતવણી પણ આપવામાં આવી છે. આ સિવાય સોમવારે ચંદીગઢમાં વરસાદ અને કરા પડ્યા હતા.

વેસ્ટર્ન ડિસ્ટર્બન્સની અસર ઉત્તર પ્રદેશમાં પણ જોવા મળી રહી છે. સોમવારે રાત્રે ઠંડા પવન સાથે વરસાદ નોંધાયો હતો. હવામાન વિભાગે પશ્ચિમ યુપીના ઘણા વિસ્તારોમાં યલો એલર્ટ જાહેર કર્યું છે. આ સાથે 20 અને 21 ફેબ્રુઆરી દરમિયાન તોફાન, વીજળી અને તેજ પવનની શક્યતા છે. 19મી અને 20મી ફેબ્રુઆરી દરમિયાન રાજસ્થાનમાં છૂટાછવાયા વાવાઝોડા, વીજળી અને ભારે પવનની શક્યતા છે.

પહાડી રાજ્યોમાં રેડ અને ઓરેન્જ એલર્ટ

પર્વતીય રાજ્યોમાં હવામાન વિભાગે દેશમાં ભારે વરસાદ અને હિમવર્ષાના રેડ અને ઓરેન્જ એલર્ટ જારી કર્યા છે. હવામાન વિભાગે મંગળવાર અને બુધવારે ભારે હિમવર્ષાનું રેડ એલર્ટ જાહેર કર્યું છે. આ એલર્ટ 7 જિલ્લાઓ માટે જારી કરવામાં આવ્યું છે. ચંબા, કાંગડા, કુલ્લુ, શિમલા, કિન્નૌર, લાહૌલ સ્પીતિ અને મંડીમાં કેટલાક સ્થળોએ ભારે હિમવર્ષા થઈ શકે છે.

શું તમે પણ સોનું-ચાંદી ખરીદવાની તૈયારી કરી રહ્યા છો? મહાશિવરાત્રી પહેલા મહા ફેરફાર, જાણો આજનો ભાવ

હવામાન વિભાગની આગાહીથી ખેડૂતોમાં ફફડાટ, આટલા જિલ્લામાં મેઘરાજા ધબધબાટી બોલાવશે, જાણી લો નવ આગાહી

ગઢવી-આહીર વિવાદ સોનલધામ મઢડા પહોંચ્યો, ગિરીશ આપા અને વિક્રમ માડમે ચારણ-આહીર વિશે કહ્યું આવું-આવું

હવામાન વિભાગે આજે એટલે કે મંગળવાર (20 ફેબ્રુઆરી) હિમાચલ પ્રદેશ, લદ્દાખ, ઉત્તરાખંડ અને જમ્મુ કાશ્મીરમાં ભારેથી અતિભારે વરસાદ અને હિમવર્ષાની આગાહી જારી કરી છે. હિમવર્ષાના કારણે શ્રીનગર-લેહ હાઈવે સહિત ઘણા રસ્તાઓ બંધ થઈ ગયા છે. આ સાથે હવામાન વિભાગે જમ્મુ-કાશ્મીરમાં આગામી ત્રણ દિવસ હિમવર્ષા અને વરસાદની આગાહી કરી છે.