ફરીવાર આખા ગુજરાતને મેઘરાજા ડુબાડી દેશે, અંબાલાલની ચારેકોર સાંબેલાધાર વરસાદની આગાહી

આજે ફરી એકવાર ભાવનગર, જામનગર, જૂનાગઢ, અમરેલી અને સુરત સહિતના વિસ્તારોમાં વરસાદ પડ્યો છે. ત્યારે હવામાન વિભાગ અને અંબાલાલ પટેલે રાજ્યમાં ફરી ભારે વરસાદની આગાહી કરી છે.

અંબાલાલ પટેલની નવી આગાહી પ્રમાણે વાત કરીએ તો 10 સપ્ટેમ્બરની આસપાસ બંગાળની ખાડીમાં વધુ એક મજબૂત હવામાન સિસ્ટમ બની શકે છે. આ સિસ્ટમ 12થી 13 સપ્ટેમ્બરની આસપાસ ગુજરાત તરફ આગળ વધે અને તેની અસરથી 14થી 20 સપ્ટેમ્બર દરમિયાન રાજ્યમાં સારો વરસાદ પડે તેવી શક્યતા છે. આ સમયગાળામાં મધ્ય અને ઉત્તર ગુજરાતમાં ભારે વરસાદની શક્યતા તેમણે વ્યક્ત કરી છે.

અંબાલાલે આગળ પણ વાત કરી કે દક્ષિણ ગુજરાતના કેટલાક વિસ્તારોમાં અતિભારે વરસાદ પડી શકે છે. સૌરાષ્ટ્રના કેટલાક વિસ્તારોમાં પણ ભારે વરસાદ થવાની શક્યતા છે, જ્યારે પશ્ચિમ સૌરાષ્ટ્રમાં સારો વરસાદ પડી શકે છે. કચ્છના કેટલાક વિસ્તારોમાં પણ વરસાદની સંભાવના રહેશે. જો કે હવે આગામી સમયમાં જોવાનું રહ્યું કે મેઘરાજા ગુજરાતના ખેડૂતોને કેવાં રાજી કરે છે.

હવામાન નિષ્ણાત અંબાલાલ પટેલની ગુજરાત માટે આગામી મહિનાઓની વિસ્તૃત આગાહી વિશે પણ જો વાત કરવામાં આવે તો સપ્ટેમ્બરમાં હળવાથી ભારે વરસાદ, સપ્ટેમ્બરના અંતે ગાજવીજ સાથે વરસાદ, શિયાળામાં પશ્ચિમી વિક્ષેપને કારણે માવઠું અને વાવાઝોડાની શક્યતાઓ દર્શાવી છે.