અમદાવાદ ક્રાઈમ બ્રાન્ચે નરોડામાંથી ₹4.50 કરોડનું MD ડ્રગ્સ ઝડપ્યું, MPના ત્રણ શખ્સો દબોચાયા

અમદાવાદ સિટી ક્રાઈમ બ્રાન્ચે નરોડા વિસ્તારમાં હંસપુરા ચાર રસ્તા પાસે કોર્ડન કરીને મધ્યપ્રદેશના મંદસૌર જિલ્લાના ત્રણ લોકોની ધરપકડ કરી હતી. તેમના કબજામાંથી 939 ગ્રામ ગેરકાયદેસર મેફેડ્રોન (MD) ડ્રગ્સ જપ્ત કરવામાં આવ્યું હતું. આંતરરાષ્ટ્રીય બજારમાં તેની કિંમત 4.50 કરોડ રૂપિયા હોવાનું કહેવાય છે.

ધરપકડ કરાયેલા આરોપીઓમાં મધ્યપ્રદેશના મંદસૌર જિલ્લાના સીતામાઉ તાલુકાના દીપખેડા ગામના રહેવાસી અસલમ પિંજારા (મન્સૂરી) (29), અમલવડ ગામનો રહેવાસી શેઝાદ મન્સૂરી (22) અને મનસાના ઈન્દિરા કોલોની વોર્ડ નંબર 40ના રહેવાસી ઈમરાન મન્સૂરી (28)નો સમાવેશ થાય છે.

ક્રાઈમ બ્રાન્ચના ડેપ્યુટી કમિશનર (ડીસીપી) અજિત રાજયાનના જણાવ્યા મુજબ, પોલીસ ટીમને 11 સપ્ટેમ્બરના રોજ સચોટ માહિતી મળી હતી કે મધ્યપ્રદેશના ત્રણ વ્યક્તિઓ એક કારમાં અમદાવાદ આવી રહ્યા છે અને માદક દ્રવ્યોનો જંગી જથ્થો પહોંચાડી રહ્યા છે. આ માહિતીના આધારે હંસપુરા ચાર રસ્તા પર નજર રાખવામાં આવી હતી. કાર ત્યાંથી પસાર થઈ રહી હતી ત્યારે તેને અટકાવી તલાશી લેવામાં આવી હતી.

તપાસ દરમિયાન 939 ગ્રામ એમડી ડ્રગ્સ મળી આવ્યું હતું. સ્થાનિક બજારમાં તેની કિંમત 28 લાખ રૂપિયા અને આંતરરાષ્ટ્રીય બજારમાં 4.50 કરોડ રૂપિયા આંકવામાં આવી છે. આ પછી કારમાં સવાર ત્રણ લોકો ઝડપાઈ ગયા હતા. આરોપીઓ પાસેથી 3 મોબાઈલ ફોન, કાર અને અન્ય ચીજવસ્તુઓ સહિત રૂ.31 લાખનો સામાન જપ્ત કરવામાં આવ્યો છે. તેમની સામે NDPS એક્ટ હેઠળ કેસ નોંધવામાં આવ્યો છે.

મંદસૌરના ‘લાલા’ની સલાહથી અમદાવાદ આવ્યા

પ્રાથમિક પૂછપરછ દરમિયાન, ત્રણેય આરોપીઓએ ખુલાસો કર્યો હતો કે તેઓ એમપીના મંદસૌરની ઈન્દિરા કોલોનીમાં રહેતા ઈમરાન પઠાણ ઉર્ફે લાલાના કહેવાથી ડિલિવરી માટે ડ્રગ્સના કન્સાઈનમેન્ટ લઈને અમદાવાદ આવ્યા હતા. અહીં પહોંચ્યા બાદ તેઓ મોબાઈલ પર લાલાને સંપર્ક કરીને ડિલિવરી લેવા આવનાર વ્યક્તિને સામાન આપવા જતા હતા. ક્રાઈમ બ્રાન્ચ એ જાણવાનો પ્રયાસ કરી રહી છે કે અમદાવાદમાં ક્યા સ્થળે આ ડિલિવરી આપવાની હતી અને આ સમગ્ર નેટવર્કમાં કોણ કોણ સામેલ છે. આરોપીએ પહેલા અહી ડીલીવરી કરી હતી કે નહી.

આરોપીના 10 દિવસના રિમાન્ડ મંજૂર

ક્રાઈમ બ્રાન્ચે ત્રણેય આરોપીઓને કોર્ટમાં રજૂ કર્યા હતા. કોર્ટે આરોપીના 10 દિવસના રિમાન્ડ મંજૂર કર્યા હતા.

રાયપુર વિસ્તારમાંથી પણ આરોપીની ધરપકડ કરવામાં આવી છે

માહિતીના આધારે શહેરના ઝોન-6 ડીસીપીની એલસીબી ટીમ અને કાગડાપીઠ પોલીસની ટીમે રાયપુર વિસ્તારમાંથી એક યુવકને 92 ગ્રામ એમડી ડ્રગ્સ સાથે પકડી પાડ્યો હતો. સ્થાનિક બજારમાં તેની કિંમત 2.77 લાખ રૂપિયા છે. આરોપીનું નામ આદિલખા મેવાતી (40) છે, જે મધ્યપ્રદેશના મંદસૌરમાં ઈન્દિરા કોલોનીનો રહેવાસી છે.