ડાયમંડ કિંગ ગોવિંદ ધોળકિયાના પુત્ર સાથે 76.44 લાખની છેતરપિંડી, સુરત ક્રાઈમ બ્રાન્ચે ઠગબાજ દંપતીની કરી ધરપકડ

રાજ્યસભાના સાંસદ અને જાણીતા ઉદ્યોગપતિ ‘ડાયમંડ કિંગ’ ગોવિંદ ધોળકિયાના પરિવાર સાથે કરોડો રૂપિયાના ઈ-સ્ટેમ્પ પેપર ખરીદીના નામે થયેલી છેતરપિંડીના મામલામાં સુરત ક્રાઈમ બ્રાન્ચને મોટી સફળતા મળી છે. ગોવિંદ ધોળકિયાના પુત્ર સાથે છેતરપિંડી કેસ (Govind Dholakia Son Cheating Case) માં સંડોવાયેલા આરોપી ઈ-સ્ટેમ્પ વેન્ડર રામકૃષ્ણ મેવાવાળા અને તેની પત્ની સલોની મેવાવાળાની પોલીસે ધરપકડ કરી કાયદેસરની કાર્યવાહી હાથ ધરી છે.

જમીન ખરીદી માટે ઈ-સ્ટેમ્પના નામે 76.44 લાખ મેળવ્યા

આ ઘટનાની પ્રાપ્ત વિગતો અનુસાર, ગોવિંદ ધોળકિયાના પુત્ર શ્રેયાંશ ધોળકિયા વતી તેમની ડાયમંડ કંપનીના મેનેજર કનુભાઈએ 10 જૂન 2025ના રોજ પોલીસ ફરિયાદ નોંધાવી હતી:

• વિશ્વાસમાં લીધા: આરોપીઓએ પોતાની પાસે ઈ-સ્ટેમ્પ વેન્ડરનું લાયસન્સ હોવાનું કહી ફરિયાદીનો વિશ્વાસ સંપાદન કર્યો હતો.
• જમીનના દસ્તાવેજ: જમીન ખરીદીના દસ્તાવેજો માટે રૂ. 76,44,900 ના ઈ-સ્ટેમ્પ ખરીદવાની જરૂરિયાત હોવાનું જણાવાયું હતું.
• રૂપિયા મેળવી રસીદ ન આપી: ફરિયાદી પાસેથી રૂ. 76.44 લાખ મેળવ્યા બાદ આરોપીઓએ ઈ-સ્ટેમ્પ પોતાના નામે મેળવી લીધા હતા અને અન્ય વ્યક્તિને ઈશ્યુ કરી દીધા હોવાનો આક્ષેપ થયો હતો.

વિશ્વાસઘાત અને કાનૂની કાર્યવાહી

ફરિયાદી દ્વારા વારંવાર રજૂઆત કરવા છતાં આરોપી દંપતીએ ઈ-સ્ટેમ્પ કે મેળવેલી રોકડ રકમ પરત આપી નહોતી. વિશ્વાસઘાત થયો હોવાનો અહેસાસ થતાં જ મામલો પોલીસ સ્ટેશને પહોંચ્યો હતો.

સુરત ક્રાઈમ બ્રાન્ચે ત્વરિત કાર્યવાહી કરીને મહિલા આરોપી સલોની મેવાવાળા અને તેના પતિ રામકૃષ્ણ મેવાવાળાની ધરપકડ કરી છે. પોલીસે બંને આરોપીઓને કોર્ટમાં રજૂ કરી તેમના રિમાન્ડ મેળવવાની પ્રક્રિયા હાથ ધરી છે, જેથી આ છેતરપિંડીમાં અન્ય કોઈ વ્યક્તિઓની સંડોવણી છે કે નહીં તેની તપાસ થઈ શકે.