Bipasha Basuના ન્યુટ્રીશન પ્રોડક્ટમાં મળ્યું જીવડું! તુકારામ મુંઢેને કહી દીધી આવી વાત
બોલિવૂડ અભિનેત્રી બિપાશા બાસુએ એક ન્યુટ્રીશન પ્રોડક્ટની ગુણવત્તા અંગે ગંભીર ચિંતા વ્યક્ત કરી છે. ગુરુવાર, 10 સપ્ટેમ્બરે બિપાશાએ પોતાની ઇન્સ્ટાગ્રામ સ્ટોરી પર એક વીડિયો શેર કર્યો હતો, જેમાં તેણે દાવો કર્યો હતો કે એક ન્યુટ્રીશન પ્રોડક્ટમાં નાના જીવડાઓ જોવા મળ્યા છે.
વીડિયોમાં બિપાશા બાસુ કન્ટેનરની અંદરની સામગ્રી પર ઝૂમ કરીને તેમાં નાના જીવડાઓ હોવાનો દાવો કરતી જોવા મળે છે. તેણે વીડિયો સાથે મહારાષ્ટ્ર ફૂડ એન્ડ ડ્રગ એડમિનિસ્ટ્રેશન (FDA)ના કમિશનર તુકારામ મુંઢેને ટેગ કરીને ભેળસેળ અને હલકી ગુણવત્તાવાળા ઉત્પાદનો સામે કડક કાર્યવાહી કરવાની અપીલ કરી.
બિપાશાએ પોતાની પોસ્ટમાં ગ્રાહકોને યોગ્ય અને સુરક્ષિત ઉત્પાદનો મળે તે જરૂરી હોવાનું જણાવીને તુકારામ મુંઢેને આ મામલે મદદ કરવા અપીલ કરી હતી.
અગાઉ શ્વેતા તિવારીએ પણ કરી હતી ફરિયાદ
આ અગાઉ અભિનેત્રી શ્વેતા તિવારીએ પણ ઓનલાઈન ઓર્ડર કરેલા એક પીણામાં વંદો મળી આવ્યો હોવાનો દાવો કર્યો હતો. તેમણે પણ મહારાષ્ટ્ર FDA કમિશનરને ટેગ કરીને આવા કિસ્સાઓ સામે કાર્યવાહી કરવાની માંગ કરી હતી.
‘જિસ્મ’ સાઇન કરતી વખતે લીધો હતો મોટો જોખમ
બિપાશા બાસુએ તાજેતરમાં એલે ઇન્ડિયાને આપેલા ઇન્ટરવ્યૂમાં ફિલ્મ ‘જિસ્મ’ અંગે પણ વાત કરી હતી. અભિનેત્રીએ જણાવ્યું હતું કે ફિલ્મ સાઇન કરતી વખતે તે જાણતી હતી કે તે એક મોટું જોખમ લઈ રહી છે. તે સમયે ઉદ્યોગના ઘણા લોકોએ તેને ફિલ્મ ન કરવાની સલાહ આપી હતી, કારણ કે બોલ્ડ દ્રશ્યો તેની કારકિર્દી પર અસર કરી શકે તેવી ચિંતા વ્યક્ત કરવામાં આવી હતી.
