ગીર સોમનાથની બે સગીરાઓનું ધર્માંતરણ: ૩ દિવસ સુધી દરગાહમાં રાખી, બુરખો પહેરાવ્યો અને…..

બળજબરીથી ધર્માંતરણ કરાવવું એ કાયદાકીય ગુનો છે. સગીર વયની વ્યક્તિનું ધર્માંતરણ કરાવવું પણ ગુનો જ છે. આમ છતાં, આવી પ્રવૃત્તિઓ આચરનારા લોકો પોતાની હરકતો ચાલુ રાખે છે. ગુજરાતમાં સગીરાઓના ધર્માંતરણનો એક કિસ્સો સામે આવ્યો છે. ગીર સોમનાથ જિલ્લાની બે સગીરાઓને કથિત રીતે ધર્માંતરણ કરાવવાના અને લગ્ન કરાવવાના ઈરાદે ઉનાવા (મહેસાણા જિલ્લો) સ્થિત એક દરગાહમાં લઈ જવામાં આવી હતી. પોલીસે બંને સગીરાઓને સુરક્ષિત રીતે શોધી કાઢી છે અને એક મૌલવી સહિત ત્રણ વ્યક્તિઓની ધરપકડ કરી છે. અન્ય એક શંકાસ્પદ વ્યક્તિ હજુ ફરાર છે.

પોલીસના જણાવ્યા અનુસાર, આ બંને સગીરાઓ પરીક્ષા આપવા માટે ઘરેથી નીકળી હતી, પરંતુ મોડી રાત સુધી પરત ફરી ન હતી. ૨૪ ઓક્ટોબરના રોજ એક મહિલાએ પોલીસમાં ફરિયાદ નોંધાવી હતી કે એક સગીરા ગુમ થઈ ગઈ છે. ત્યારબાદ પોલીસે તપાસ શરૂ કરી. તપાસ દરમિયાન, સીસીટીવી ફૂટેજ અને મોબાઈલ ફોન લોકેશન ડેટાના આધારે જાણવા મળ્યું કે આ સગીરાઓ મહેસાણા જિલ્લાના ઉનાવામાં છે.

ઉનાવા પોલીસની મદદથી કોડીનાર પોલીસે બંને સગીરાઓને ‘દાતાર બાપુ દરગાહ’માંથી શોધી કાઢી. પોલીસના જણાવ્યા મુજબ, દરગાહમાં આ સગીરાઓ બુરખા પહેરેલી હાલતમાં મળી આવી હતી. તેમને કથિત રીતે ત્યાં ત્રણ દિવસ સુધી રાખવામાં આવી હતી. પ્રાથમિક તપાસમાં બહાર આવ્યું છે કે આ સમયગાળા દરમિયાન તેમના નામ બદલી નાખવામાં આવ્યા હતા, તેમને બુરખા પહેરાવવામાં આવ્યા હતા અને તેમની પાસે કલમા પઢાવવામાં આવ્યા હતા.