વિરાટ કોહલીએ અમદાવાદના નરેન્દ્ર મોદી સ્ટેડિયમમાં તેની આંતરરાષ્ટ્રીય ક્રિકેટ કારકિર્દીની 75મી સદી ફટકારી હતી. વિરાટે ઓસ્ટ્રેલિયા સામેની ચોથી ટેસ્ટની પ્રથમ ઇનિંગમાં 186 રન બનાવ્યા હતા. તે બેવડી સદી ફટકારવામાંથી ચૂકી ગયો, પરંતુ આ સમયગાળા દરમિયાન તેણે ઘણા રેકોર્ડ બનાવ્યા. કોહલીએ સદી પત્ની અનુષ્કા શર્માને સમર્પિત કરી હતી. આ સાથે જ અનુષ્કાએ સોશિયલ મીડિયા પર એક મોટો ખુલાસો કર્યો છે.
ઈન્સ્ટાગ્રામ સ્ટોરીમાં કોહલીનો વીડિયો શેર કરતા અનુષ્કાએ જણાવ્યું કે વિરાટે બીમાર હોવા છતાં આટલી મોટી ઈનિંગ રમી. તે નબળાઈ અનુભવી રહ્યો હતો. અનુષ્કાએ લખ્યું, “આટલી સંયમ સાથે બીમારીનો સામનો કર્યો છે. તમે હંમેશા મને પ્રેરણા આપી છે.કોહલીએ 1205 દિવસ બાદ ટેસ્ટ ક્રિકેટમાં સદી ફટકારી હતી. આ તેની 28મી ટેસ્ટ સદી છે. વિરાટે છેલ્લે 23 નવેમ્બર 2019ના રોજ કોલકાતામાં બાંગ્લાદેશ સામે સદી ફટકારી હતી.
ટેસ્ટ ક્રિકેટમાં વિરાટ કોહલીની આ બીજી સૌથી ધીમી સદી પણ છે. તેણે આ સદી માટે 241 બોલનો સામનો કર્યો હતો. કોહલીની સૌથી ધીમી સદી 2012માં નાગપુરના મેદાનમાં ઈંગ્લેન્ડ સામે આવી હતી. તે મેચમાં તેણે સદી માટે 289 બોલનો સામનો કર્યો હતો.ઓસ્ટ્રેલિયાએ ટોસ જીતીને પ્રથમ બેટિંગ કરવાનો નિર્ણય કર્યો હતો. ઓસ્ટ્રેલિયાએ પ્રથમ દાવમાં ઉસ્માન ખ્વાજાના 180 અને કેમેરોન ગ્રીનના 114 રનની મદદથી 480 રન બનાવ્યા હતા. ભારત તરફથી રવિચંદ્રન અશ્વિને સૌથી વધુ છ વિકેટ લીધી હતી. જવાબમાં ભારતે શુભમન ગિલના 128, વિરાટ કોહલીના 186 અને અક્ષર પટેલના 79 રનની મદદથી 571 રન બનાવ્યા હતા. નાથન લિયોન અને ટોડ મર્ફીએ ત્રણ-ત્રણ વિકેટ લીધી હતી. પ્રથમ દાવના આધારે ભારતને 91 રનની લીડ મળી હતી. જવાબમાં ઓસ્ટ્રેલિયાએ ચોથા દિવસની રમતના અંત સુધી એકપણ વિકેટ ગુમાવ્યા વિના ત્રણ રન બનાવ્યા હતા.