‘ક્રિકેટ પિચ 18 વર્ષથી મારું ઘર રહી છે, હવે…’ – 37 વર્ષની ઉંમરે કોહલીની નવી શરૂઆત; ચાહકો ચોંકી ગયાં

વિરાટ કોહલીએ ૩૭ વર્ષની ઉંમરે એક નવી સફર શરૂ કરી છે. તેમણે એક એવા પ્લેટફોર્મ પર પ્રવેશ કર્યો છે જ્યાં સામાન્ય લોકો પહેલેથી જ સક્રિય છે: લિંક્ડઈન (LinkedIn). માત્ર ક્રિકેટર હોવા ઉપરાંત, કોહલી એક મોટા ઉદ્યોગસાહસિક પણ છે. આ બાબતને ધ્યાનમાં રાખીને, ‘કિંગ કોહલી’એ લિંક્ડઈન પર પદાર્પણ કર્યું છે. તેમની પ્રોફાઇલનો સ્ક્રીનશોટ સોશિયલ મીડિયા પર ઝડપથી વાયરલ થઈ રહ્યો છે.

કોહલી હાલમાં સ્પોર્ટસવેર બ્રાન્ડ ‘Agilitas’ (એજિલિટાસ) માં રોકાણકાર છે અને ‘one8world’ (વન-એટ-વર્લ્ડ) ના સહ-સ્થાપક છે. તેઓ ભૂતકાળમાં અન્ય ઘણી બ્રાન્ડ્સ સાથે પણ જોડાયેલા રહ્યા છે. તેમના બાયો (પરિચય) માં, આ ભારતીય ખેલાડીએ પોતાની ક્રિકેટની સફર વિશે વાત કરતા લખ્યું છે કે ક્રિકેટ પિચ ૧૮ વર્ષથી તેમનું ઘર રહી છે. તેઓ લખે છે, “આ ૨૨ ગજે (પિચે) માત્ર મારી રમતને જ નહીં, પરંતુ આજે હું જે વ્યક્તિ છું તેને પણ ઘડ્યો છે; આ માટે, હું આ રમતનો એટલો ઋણી છું કે તેને ક્યારેય સંપૂર્ણપણે ચૂકવી શકું તેમ નથી.”

પ્રથમ પોસ્ટથી જ ઈરાદા સ્પષ્ટ કર્યા

કોહલીએ પોતાની પહેલી પોસ્ટથી જ પોતાના ઈરાદા સ્પષ્ટ કરી દીધા હતા. તેમણે લખ્યું, “મેં હંમેશાં એવા ભારતની કલ્પના કરી છે જ્યાં દરેક રમતને પ્રેમ કરવામાં આવે, તેને સન્માન મળે અને તે રમવામાં આવે. આજે, તે સ્વપ્ન વાસ્તવિકતાની પહેલાં કરતાં વધુ નજીક જણાય છે. નવી પેઢી સાબિત કરી રહી છે કે ભારત વિશ્વ-સ્તરના ખેલાડીઓ તૈયાર કરી શકે છે અને વૈશ્વિક સ્તરે બ્રાન્ડ્સ સ્થાપિત કરી શકે છે. અમારો ધ્યેય ભારતમાંથી એક સર્વગ્રાહી સ્પોર્ટ્સ ઇકોસિસ્ટમ બનાવવાનો છે – જેમાં ઉત્પાદન (મેન્યુફેક્ચરિંગ), કન્ઝ્યુમર બ્રાન્ડ્સ અને સ્પોર્ટ્સ ડિસ્ટ્રિબ્યુશનનો સમાવેશ થાય છે.

અમારું માનવું છે કે ભારત માત્ર વૈશ્વિક રમતોમાં ભાગ લેવાને બદલે તેના ભવિષ્યને ઘડવામાં યોગદાન આપી શકે છે.” કોહલીએ આગળ લખ્યું, “તેથી જ મેં રોકાણકાર તરીકે ‘Agilitas’ સાથે અને ‘one8world’ ના સહ-સ્થાપક અને સહ-નિર્માતા તરીકે ભાગીદારી કરી છે. ‘one8’ એ ફિલસૂફી પર આધારિત છે જેને મેં મારી સમગ્ર કારકિર્દી દરમિયાન અપનાવી છે: વિકાસ ત્યારે જ થાય છે જ્યારે તમે સીમાઓથી આગળ વધો છો, ધોરણો ઊંચા કરો છો અને કંઈક અલગ કરવાની હિંમત રાખો છો.”