જાવા સમુદ્રમાં 240 મુસાફરો સાથેનું પેસેન્જર જહાજ ગુમ, નૌકાદળ દ્વારા સર્ચ ઓપરેશન શરૂ

ઇન્ડોનેશિયાથી એક મહત્વપૂર્ણ સમાચાર સામે આવ્યા છે જ્યાં બોર્નિયો ટાપુ નજીક એક જહાજ ગુમ થઈ ગયું છે. અહેવાલો અનુસાર, આ જહાજમાં 240 લોકો સવાર હતા અને તે દક્ષિણ કાલીમંતન જઈ રહ્યું હતું. જાવા સમુદ્રમાં હોવા દરમિયાન જહાજ સાથેનો સંપર્ક તૂટી ગયો હતો અને હાલમાં શોધખોળ અભિયાન ચલાવવામાં આવી રહ્યું છે.

દક્ષિણ કાલીમંતન જતી વખતે સંપર્ક તૂટ્યો

અધિકારીઓએ જણાવ્યું હતું કે ઇન્ડોનેશિયાની બચાવ ટીમોએ રવિવારે શોધખોળ અભિયાન શરૂ કર્યું હતું. આ અભિયાન ત્યારે શરૂ કરવામાં આવ્યું જ્યારે ૨૪૦ લોકો સાથેનું એક પેસેન્જર જહાજ પૂર્વ જાવાથી બોર્નિયો ટાપુ પર આવેલા દક્ષિણ કાલીમંતન તરફ જતી વખતે જાવા સમુદ્રમાં સંપર્ક ગુમાવી બેઠું. દક્ષિણ કાલીમંતન પ્રાંતની રાજધાની બંજરમાસિનમાં આવેલી સર્ચ એન્ડ રેસ્ક્યુ કચેરીને માહિતી મળી હતી કે ‘વર્ગો ટ્રાન્સપોર્ટ 8’ નામના જહાજની સંચાર પ્રણાલી નિષ્ફળ ગઈ હતી. આ જહાજ પૂર્વ જાવા પ્રાંતના સુરાબાયા (ઇન્ડોનેશિયાનું બીજું સૌથી મોટું શહેર) થી બંજરમાસિન શહેર તરફ જઈ રહ્યું હતું.

સર્ચ એન્ડ રેસ્ક્યુ ઓફિસના વડા આઈ પુતુ સુદાયનાએ એક વિડિયો બ્રીફિંગમાં જણાવ્યું હતું કે, “જહાજ ખરાબ હવામાનનો સામનો કરી રહ્યું હોવાના અહેવાલો મળ્યા બાદ જહાજના સંચાલકે અધિકારીઓને આ ઘટના વિશે જાણ કરી હતી.” પ્રાથમિક માહિતી મુજબ, જહાજનું છેલ્લું જાણીતું સ્થાન જાવા સમુદ્રમાં હતું, જે બંજરમાસિનના પિયર (જેટી) થી લગભગ 148 કિલોમીટર દૂર છે. અત્યાર સુધી કોઈ જાનહાનિના અહેવાલ મળ્યા નથી.

શોધખોળ અભિયાન ચાલુ

જહાજના સંચાલક, પીટી વર્ગો યોએલ રિહી (PT Virgo Yoel Rihi) એ સંપર્ક તૂટવાની જાણ કરી હતી અને જણાવ્યું હતું કે જહાજ શનિવારે સ્થાનિક સમય મુજબ સવારે 10:13 વાગ્યે સુરાબાયાથી રવાના થયું હતું. તેના જવાબમાં, બંજરમાસિનમાં બાસિરિહ સર્ચ એન્ડ રેસ્ક્યુ પિયર પર એક બચાવ ટીમ મોકલવામાં આવી હતી અને ‘વર્ગો ટ્રાન્સપોર્ટ 8’ ના છેલ્લા સંભવિત સ્થાન તરફ એક બચાવ જહાજ રવાના કરવામાં આવ્યું હતું.

શોધખોળ અભિયાનનું સંકલન કરી રહેલા સુદાયનાએ કહ્યું કે જહાજમાં મોટી સંખ્યામાં મુસાફરો અને ક્રૂ સભ્યો હોવાથી અધિકારીઓ તમામ ઉપલબ્ધ કર્મચારીઓ અને સંસાધનોને કામે લગાડી રહ્યા છે. તેમણે જણાવ્યું હતું કે એજન્સી દરિયાઈ સત્તાવાળાઓ અને અન્ય સંબંધિત એજન્સીઓ સાથે શોધખોળનું સંકલન કરી રહી છે અને સાથે સાથે વિસ્તારમાં હવામાનની સ્થિતિ પર પણ નજીકથી નજર રાખી રહી છે.