ઇફ્કો અધ્યક્ષ દિલીપ સંઘાણી પનામામાં યોજાયેલી ICA ગ્લોબલ બોર્ડ ચૂંટણીમાં ડિરેક્ટર તરીકે ચૂંટાયા

આંતરરાષ્ટ્રીય સહકારી આંદોલન માટે એક મહત્વપૂર્ણ સિદ્ધિરૂપે IFFCO (ઇફકો)ના અધ્યક્ષ દિલીપ સંઘાણીની ઇન્ટરનેશનલ કો-ઓપરેટિવ એલાયન્સ (ICA)ના ગ્લોબલ બોર્ડ ઓફ ડિરેક્ટર્સમાં ડિરેક્ટર (At-Large Director) તરીકે પસંદગી થઈ છે.

દિલીપ સંઘાણીને વિજેતા જાહેર કરવામાં આવતાં જ પનામામાં ઉપસ્થિત ભારતીય સહકારી પ્રતિનિધિમંડળના સભ્યોમાં ઉત્સાહ અને ગૌરવની લાગણી છવાઈ ગઈ. તમામ સભ્યોએ એકસ્વરે *“ભારત માતા કી જય” અને “વંદે માતરમ”*ના નારાઓથી સમગ્ર સભાખંડને ગુંજાવી દીધો.

વિદેશી ધરતી પર ગુંજેલા *“ભારત માતા કી જય” અને “વંદે માતરમ”*ના નારાઓએ વૈશ્વિક સહકારી મંચ પર ભારતની વધી રહેલી પ્રતિષ્ઠા અને પ્રભાવને અભિવ્યક્ત કર્યો.

પનામા સિટીમાં યોજાયેલી ICAની મહાસભા દરમિયાન થયેલી ચૂંટણીમાં સંઘાણીની જીતને ભારતના વિશાળ સહકારી આંદોલન માટે ગૌરવપૂર્ણ ક્ષણ માનવામાં આવી રહી છે. આ સિદ્ધિ વૈશ્વિક સહકારી જગતમાં ભારતની વધી રહેલી ભૂમિકા, પ્રભાવ અને નેતૃત્વને વધુ મજબૂત બનાવે છે.

દિલીપ સંઘાણી છેલ્લા અનેક દાયકાઓથી સહકારી ક્ષેત્ર સાથે જોડાયેલા છે અને ખેડૂતો, ગ્રામ્ય અર્થવ્યવસ્થા તથા સહકારી સંસ્થાઓના સશક્તિકરણ માટે સતત કાર્ય કરતા આવ્યા છે. હાલમાં તેઓ IFFCO અને GUJCOMASOLના અધ્યક્ષ છે અને વિવિધ રાષ્ટ્રીય તથા આંતરરાષ્ટ્રીય સહકારી સંસ્થાઓમાં મહત્વપૂર્ણ જવાબદારીઓ નિભાવી ચૂક્યા છે.

ICA વિશ્વનું અગ્રણી વૈશ્વિક સહકારી સંગઠન છે, જે વિવિધ દેશો અને પ્રદેશોની સહકારી સંસ્થાઓનું પ્રતિનિધિત્વ કરે છે. ICAના ગ્લોબલ બોર્ડમાં ભારતનું પ્રતિનિધિત્વ ભારતીય સહકારી આંદોલનના અવાજને આંતરરાષ્ટ્રીય મંચ પર વધુ મજબૂત બનાવશે.

સંઘાણીની આ જીત માનનીય પ્રધાનમંત્રી નરેન્દ્ર મોદીજીના ‘સહકારથી સમૃદ્ધિ’ના વિઝન તેમજ ભારતના સહકારી આંદોલનની વૈશ્વિક સ્વીકૃતિને પણ દર્શાવે છે. ભારત આજે સહકારના માધ્યમથી ખેડૂતો, ગ્રામ્ય સમુદાયો અને સામાન્ય નાગરિકોના આર્થિક તથા સામાજિક સશક્તિકરણની દિશામાં નવી મિસાલ પ્રસ્થાપિત કરી રહ્યું છે.

દિલીપ સંઘાણીએ પોતાની જીત બદલ ICAના તમામ સભ્ય દેશો, પ્રતિનિધિઓ અને વૈશ્વિક સહકારી સમુદાયનો આભાર વ્યક્ત કરતાં જણાવ્યું કે તેઓ ભારતના સહકારી આંદોલનની ભાવના, અનુભવ અને દૃષ્ટિકોણને વૈશ્વિક મંચ પર અસરકારક રીતે રજૂ કરવા તેમજ સમગ્ર વિશ્વમાં સહકારિતાને વધુ મજબૂત બનાવવા માટે પ્રતિબદ્ધ છે.

દિલીપ સંઘાણીનું ICA બોર્ડમાં ચૂંટાવું ભારત માટે ગૌરવ, ભારતીય સહકારી આંદોલન માટે સન્માન અને વૈશ્વિક સહકારી ક્ષેત્રમાં ભારતના વધી રહેલા પ્રભાવનું મહત્વપૂર્ણ પ્રતીક છે.