20 વર્ષનો વિયોગ, જંગલનો વિકટ રસ્તો અને અડગ પ્રેમ; કર્ણાટકમાં 105 વર્ષીય માતાને મળી 85 વર્ષની દીકરી

કર્ણાટકના દક્ષિણ કન્નડ જિલ્લામાંથી એક અત્યંત હૃદયસ્પર્શી અને ભાવુક કિસ્સો સામે આવ્યો છે, જ્યાં લગભગ બે દાયકાના લાંબા ગાળા બાદ 105 વર્ષીય માતાનું તેમના 85 વર્ષીય પુત્રી સાથે પુનર્મિલન થયું. આટલી મોટી ઉંમરે માતા અને પુત્રી વચ્ચેનું આ દુર્લભ અને ભાવનાત્મક મિલન કોઈપણની આંખોમાં આંસુ લાવી દે તેવું છે. આ ઘટના દક્ષિણ કન્નડ જિલ્લાના બેલ્થંગડી તાલુકામાં માલાવંતિકે નજીક આવેલા ‘મક્કી’ નામના નાના ગ્રામીણ વિસ્તારમાં બની હતી.

વિશ્વસનીય માહિતી મુજબ 105 વર્ષીય સીથમ્મા તેમના પરિવાર સાથે મક્કી ગામમાં રહે છે અને તેમને કુલ 11 સંતાનો છે. તેમની સૌથી મોટી પુત્રી સુશીલા જે હાલમાં 85 વર્ષની છે. તે મિથાબાગિલુમાં પોતાના સંતાનો સાથે રહે છે. બંને પરિવારો વચ્ચેનું અંતર ઘણું વધારે હતું અને ભૌગોલિક પરિસ્થિતિ અત્યંત પડકારજનક હતી. સીથમ્માના ઘર સુધી પહોંચવા માટે કોઈ પાકો રસ્તો નથી. ત્યાં જવા માટે મુસાફરોએ ગાઢ જંગલોમાંથી જીપ દ્વારા મુસાફરી કરવી પડે છે અને ત્યારબાદ એક નાની નદી કે ઝરણું ઓળંગીને ઢાળવાળા રસ્તા પર લગભગ દોઢ કિલોમીટર સુધી પગપાળા ચાલવું પડે છે.

ઉંમરને લગતી સ્વાસ્થ્ય સમસ્યાઓ અને ભૌગોલિક અવરોધોને કારણે સુશીલા લાંબા સમયથી તેમની માતાને મળી શક્યા ન હતા, પરિણામે તેઓ 20 વર્ષ સુધી એકબીજાને મળી શક્યા ન હતા. આ બે દાયકા દરમિયાન તેમની પાસે માત્ર જૂની યાદો જ બાકી હતી. જોકે, સુશીલાના પૌત્ર-પૌત્રીઓએ તેમની દાદીની લાંબા સમયથી સેવેલી ઈચ્છા પૂરી કરવાનો સંકલ્પ કર્યો. તેઓ તેમની વૃદ્ધ દાદીને સુરક્ષિત રીતે મક્કી લઈ જવા માટે આગળ આવ્યા અને તેમને જીપ દ્વારા જંગલના દુર્ગમ રસ્તાઓ પરથી સીથમ્માના ઘર સુધી પહોંચાડ્યા.

જીપ આખા રસ્તે જઈ શકતી ન હોવાથી પૌત્ર-પૌત્રીઓએ જંગલના રસ્તાના છેલ્લા અને મુશ્કેલ ભાગને પગપાળા પાર કરવામાં સુશીલાને કાળજીપૂર્વક મદદ કરી. આ પડકારજનક મુસાફરી પૂર્ણ કર્યા પછી સુશીલા આખરે તેમની માતાના ઘરે પહોંચ્યા અને લગભગ વીસ વર્ષ પછી તેમની માતા સીથમ્માને ભેટી પડ્યા.

આ ભાવુક ક્ષણને યાદ કરતા સુશીલાના પૌત્ર કેશવે જણાવ્યું કે તેમની દાદીનું તેમની માતા સાથે પુનર્મિલન કરાવવું એ એક પ્રિય સ્વપ્ન હતું. જે પાકા રસ્તાઓના અભાવ અને વૃદ્ધાવસ્થાની મર્યાદાઓ હોવા છતાં આખરે સાકાર થયું. આ અનોખા મિલને સાબિત કરી દીધું કે પારિવારિક સ્નેહ અને સ્વજનોના નિષ્ઠાવાન પ્રયાસો સૌથી મોટા અવરોધોને પણ પાર કરી શકે છે.