સરથાણામાં ડુપ્લિકેટ માવાની ફેક્ટરી પર ત્રાટકી ટીમ, 683 કિલો ભેળસેળયુક્ત મીઠાઈ જપ્ત

તહેવારોની મોસમ નજીક આવતાં જ સુરત શહેરમાં લોકોના આરોગ્ય સાથે ચેડાં કરતાં અસામાજિક તત્વો સામે તંત્રે લાલ આંખ કરી છે. સુરત શહેર ઝોન 1 LCB (લોકલ ક્રાઈમ બ્રાંચ) અને ફૂડ એન્ડ ડ્રગ્સ ડિપાર્ટમેન્ટ દ્વારા સરથાણા પોલીસ સ્ટેશન વિસ્તારમાં આવેલા સિલ્વર ચોક નજીકના એક ગોડાઉન પર સંયુક્ત દરોડો પાડવામાં આવ્યો હતો. આ કાર્યવાહી દરમિયાન મોટા પ્રમાણમાં ડુપ્લિકેટ માવામાંથી બનાવવામાં આવતી વિષકારી મીઠાઈઓનો જથ્થો ઝડપી પાડવામાં આવ્યો છે.

છેલ્લા 3 વર્ષથી ચાલતું હતું ગેરકાયદે નેટવર્ક

પોલીસને મળેલી ચોક્કસ બાતમીના આધારે હાથ ધરવામાં આવેલી તપાસમાં સામે આવ્યું કે ભાવેશભાઈ છગનભાઈ વઘાસિયા નામનો ઈસમ છેલ્લા ત્રણ વર્ષથી આ ગેરકાયદેસર કાળો કારોબાર ચલાવી રહ્યો હતો.

સસ્તા ભાવે માવાની ખરીદી: આરોપી તલાલા અને અમદાવાદ જેવા વિસ્તારોમાંથી માત્ર રૂ. 180 પ્રતિ કિલોના અત્યંત સસ્તા ભાવે ડુપ્લિકેટ/કેમિકલયુક્ત માવો ખરીદી લાવતો હતો.

સિન્ટિટીક કલરનો ઉપયોગ: આ માવામાં માનવ શરીર માટે હાનિકારક એવા સિન્ટિટીક અને કેમિકલ કલર ઉમેરીને આકર્ષક દેખાતી વિવિધ મીઠાઈઓ તૈયાર કરાતી હતી.

હોલસેલ વેચાણ: તૈયાર થયેલી બનાવટી મીઠાઈઓને સુરત શહેરની વિવિધ દુકાનોમાં હોલસેલ ભાવે વેચીને લોકોના આરોગ્ય સાથે ખુલ્લેઆમ ખીલવાડ કરવામાં આવતો હતો.

683 કિલો મુદ્દામાલ જપ્ત કરી સ્થળ પર જ નાશ કરાયો

દરોડા દરમિયાન તપાસ ટીમે ગોડાઉનમાંથી આશરે 683 કિલો ભેળસેળયુક્ત માવો અને વિવિધ મીઠાઈઓનો મુદ્દામાલ કબજે કર્યો હતો, જેની અંદાજિત કિંમત રૂ. 1,40,000 જેટલી થાય છે. જાહેર આરોગ્યની ગંભીરતાને ધ્યાનમાં રાખીને પોલીસ અને ફૂડ ડિપાર્ટમેન્ટે આ તમામ દૂષિત અને ઝેરી મુદ્દામાલનો સ્થળ પર જ નાશ કરી દીધો હતો.

સેમ્પલ લેબોરેટરીમાં મોકલાયા, કડક કાર્યવાહીની ચીમકી

પોલીસ અધિકારીના જણાવ્યા અનુસાર આરોપી સામે કાયદેસરનો ગુનો નોંધી વધુ તપાસ હાથ ધરવામાં આવી છે. મીઠાઈ અને માવામાં વપરાયેલા કેમિકલ્સ કેટલા ઝેરી છે તેની ચકાસણી માટે નમૂનાઓ સ્ટેટ લેબોરેટરીમાં મોકલવામાં આવ્યા છે. જો લેબોરેટરી રિપોર્ટમાં ગંભીર કે ઝેરી પદાર્થોની હાજરી જણાશે, તો આરોપી સામે વધુ કડક કાનૂની કલમો હેઠળ ગુનો દાખલ કરવામાં આવશે. તંત્ર દ્વારા સ્પષ્ટ ચેતવણી આપવામાં આવી છે કે તહેવારોની સિઝનમાં લોકોના સ્વાસ્થ્ય સાથે ખીલવાડ કરનારાઓ સામે સતત વોચ રાખીને કડકમાં કડક પગલાં લેવાશે.