સુરતમાં SRP જવાન સામે નર્સે નોંધાવી દુષ્કર્મની ફરિયાદ, ફોટો-વીડિયો વાયરલ કરવાની ધમકી આપી આચર્યું દુષ્કર્મ

સુરત શહેરના કાપોદ્રા વિસ્તારમાં આવેલી ખાનગી હોસ્પિટલમાં નર્સ તરીકે કામ કરતી 30 વર્ષીય યુવતીએ ડેડિયાપાડાના SRP જવાન વિજ્ઞેશ રાવજીભાઈ વસાવા સામે દુષ્કર્મ અને ધમકી આપવાની ગંભીર ફરિયાદ કાપોદ્રા પોલીસ મથકે નોંધાવી છે.

પોલીસ ફરિયાદમાં જણાવ્યા અનુસાર, પીડિત નર્સ અને SRP જવાન વચ્ચે અગાઉ આશરે ત્રણ વર્ષ સુધી પ્રેમસંબંધ હતો. જોકે સંબંધોમાં ખટાશ આવ્યા બાદ બંને પક્ષના પરિવારજનો અને સમાજના આગેવાનોની હાજરીમાં બેઠક યોજીને સમાધાન કરવામાં આવ્યું હતું.

સમાધાન અને દંડ છતાં ધમકી આપી

સમાધાનની શરત મુજબ SRP જવાને યુવતીના તમામ અંગત ફોટા, વીડિયો અને મેસેજ ડિલીટ કરવાના હતા. આ ઉપરાંત સમાજ દ્વારા SRP જવાનને ₹8 લાખનો દંડ ફટકારવામાં આવ્યો હતો, જેમાંથી ₹5.30 લાખ ચૂકવી દેવામાં આવ્યા હતા. આ સમાધાન બાદ બંને અલગ થઈ ગયા હતા.

હોસ્પિટલમાં ધમાલ અને ગેસ્ટહાઉસમાં દુષ્કર્મ:

આરોપ મુજબ, ગત 1 મેના રોજ સુરતમાં બંદોબસ્તની ફરજ દરમિયાન આરોપી વિજ્ઞેશ વસાવા નર્સ જ્યાં કામ કરતી હતી તે હોસ્પિટલે પહોંચ્યો હતો. તેણે ત્યાં ધમાલ મચાવવાની અને જાનથી મારી નાખવાની ધમકી આપી યુવતીને જબરદસ્તી પોતાની સાથે લઈ ગયો હતો. ત્યારબાદ તેને લાલદરવાજા વિસ્તારમાં આવેલા ‘આવકાર ગેસ્ટહાઉસ’ માં લઈ જઈ જૂના અંગત ફોટો-વીડિયો સોશિયલ મીડિયામાં વાયરલ કરવાની ધમકી આપીને યુવતીની મરજી વિરુદ્ધ દુષ્કર્મ આચર્યું હતું.

પોલીસ કાર્યવાહી

સમગ્ર ઘટના અંગે પીડિત નર્સે હિંમત દાખવીને કાપોદ્રા પોલીસ મથકમાં લેખિત ફરિયાદ નોંધાવી છે. કાપોદ્રા પોલીસે SRP જવાન વિજ્ઞેશ વસાવા સામે ગંભીર કલમો હેઠળ ગુનો નોંધી તેની ધરપકડ માટે ચક્રો ગતિમાન કર્યા છે.